Galicia, entre as autonomías onde máis crece o PIB

Asturias, Murcia e Galicia son as autonomías onde máis creceu o PIB interanual no terceiro trimestre, con avances do 2,3%, do 2,2% e do 2,1%, respectivamente, mentres que Aragón, País Vasco e Canarias mostraron os menores ritmos de crecemento, cun 1,6%, segundo a estimación do PIB rexional publicada este martes pola Autoridade Independente de Responsabilidade Fiscal (AIReF).

A difusión destes datos realízase unha vez publicado o avance trimestral do PIB de España que elabora o Instituto Nacional de Estatística (INE). Este avance de datos, publicado a semana pasada, mostrou un crecemento trimestral da economía española do 0,4% no terceiro trimestre e do 2% en taxa interanual.

Segundo as estimacións da AIReF, seis comunidades autónomas rexistraron no terceiro trimestre taxas interanuais de PIB superiores á media do 2%: as xa mencionadas Asturias (2,3%), Murcia (2,2%) e Galicia (2,1%) e Comunidade Valenciana, Castela-A Mancha e Andalucía, que rexistraron tamén todas elas avances do 2,1%.

Madrid, Cataluña e Navarra igualaron a media do 2% e o resto de rexións incrementaron o seu PIB por baixo desta media: A Rioxa (1,9%), Castela e León e Cantabria (1,8%), Estremadura e Baleares (1,7%) e, por último, Canarias, País Vasco e Aragón, que rexistraron o menor crecemento interanual, cun 1,6% no tres casos.

MURCIA LIDERA O CRECEMENTO TRIMESTRAL DO PIB

En termos trimestrais (terceiro trimestre sobre segundo trimestre), Murcia foi a comunidade onde máis creceu o PIB neste período, cun avance do 0,6%, de acordo coas estimacións da AIReF.

Séguenlle, con crecementos trimestrais do 0,5%, Galicia, Estremadura, Asturias, Comunidade Valenciana, Castela-A Mancha e Cataluña. Igualando a media nacional do 0,4% figuran Madrid, Andalucía, A Rioxa, País Vasco, Castela e León e Navarra.

Os menores crecementos trimestrais do PIB déronse en Cantabria e Aragón (0,3%) e, sobre todo, en Baleares e Canarias, con só un 0,2%.

A AIReF subliña que estas son as primeiras previsións do PIB das comunidades autónomas tras a revisión estatística das Contas Nacionais publicada polo INE o pasado mes de setembro.

A metodoloxía utilizada pola AIReF para realizar estas previsións combina tres tipos de información estatística: os datos mensuais de indicadores de conxuntura desagregados a nivel territorial, os datos anuais compilados en termos de contabilidade nacional pola Contabilidade Rexional de España (CRE) e as estimacións para o conxunto nacional publicadas pola Contabilidade Nacional Trimestral (CNTR).

Comunidades que máis crecen, segundo a AIReF. AIREF | Fonte: Europa Press