O Gaiás xa acolle o Códice Calixtino e o Cancionero da Biblioteca Vaticana para a súa exhibición a partir do venres
A exposición acolle tamén o Liber Sancti Iacobi da Universidade de Salamanca, polo que nos próximos meses a cidade de Compostela reunirá tres "calixtinos".
Por E.P. | SANTIAGO DE COMPOSTELA | 13/11/2019 | Actualizada ás 20:24
O Códice Calixtino e o Candionero da Biblioteca Vaticana ocupan xa as súas vitrinas do Museo Centro Gaiás, na Cidade da Cultura, onde serán exhibidos a partir deste venres, día 15 de novembro, con motivo da mostra 'Galicia, un relato non mundo.
A exposición, que será inaugurada oficialmente este xoves, será a primeira mostra internacional da Xunta con motivo do Xacobeo 2021 e poderase visitar gratis a partir deste venres e ata o 12 de abril de 2020.
O conselleiro de Cultura e Turismo, Román Rodríguez, asistiu este mércores á instalación en sala destas dúas pezas. Un acto no que tamén estiveron presentes o secretario do Arcebispado de Santiago, Manuel Jesús Formoso; o director xeral de Políticas Culturais, Anxo Lorenzo; e o comisario da mostra, Manuel Gago, entre outros.
Diso informou a Xunta nun comunicado, no que destaca que a exposición acolle tamén o Liber Sancti Iacobi da Universidade de Salamanca, polo que nos próximos meses a cidade de Compostela reunirá tres "calixtinos".
