Nunca Máis renace en Ares

A Plataforma Nunca Máis renace logo do accidente dun quimiqueiro nas costas galegas. E o fai cunha oncentración no municipio coruñés de Ares este venres para denunciar "a situación de indefensión" da costa galega e o "auténtico despropósito" da Administración ante o caso do buque encallado nesta ría, o Blue Star.

Esta organización, que xurdiu hai 17 anos tras a catástrofe do Prestige, decidiu convocar unha concentración na Praza da Constitución da localidade ás 20,00 horas deste venres. Plataforma Nunca Máis tomou esta decisión co obxectivo de forzar á administración española a transferir a Galicia as "competencias en materia de salvamento marítimo e loita contra a contaminación mariña", unha reivindicación compartida pola Confederación Intersindical Galega (CIG) e o BNG.

Ademais, a entidade cidadá tamén reclama información "pública, transparente e detallada" sobre a xestión do accidente e unha "protección" do ecosistema mariño e da actividade produtiva pesqueira e marisqueira que ofreza "garantías" aos traballadores e que non estea condicionada nin por "os intereses privados de casa armadora nin da aseguradora", engadiu a CIG.

Así mesmo, a retirada de máis de 100 toneladas de fuel da embarcación supón unha preocupación para Plataforma Nunca Máis, polo que instan o Goberno a instalar barreiras anti-contaminación ao redor do buque e un sistema de bombeo desde o mar en caso de vertedura para asegurar a operación. Ao seu xuízo, é imprescindible garantir os "medios, sistemas e protocolos de control" para evitar calquera incidente marítimo que se poida producir na ría de Ares.

Manifestación en Vigo de 'Nunca Máis' once anos despois da catástrofe do Prestige | Fonte: Miguel Núñez

"PERIGOS REAIS"

Pola súa banda, a CIG cre que a xestión do Blue Star confirma que, despois de 17 anos da catástrofe do Prestige, "os poderes públicos aínda non adoptaron as medidas necesarias" en materia de seguridade marítima para protexer as costas galegas.

Ademais, a portavoz do BNG en Europa, Ana Miranda, advirte que este novo caso forma parte dos "perigos reais" da costa da Comunidade e critica que no caso de que se producise unha vertedura de combustible no Blue Star, "as medidas de prevención serían as mesmas que existían cando tivemos que recoller chapapote coas mans". Na mesma liña, o voceiro de Anova, Antón Sánchez, pregúntase se os compromisos que se adoptaron tras a catástrofe do Prestige están a cumprirse.