Proxectos sobre cultivos e alimentación saudable premiados na Cátedra do Pan e do Cereal da USC
Por E.P. | LUGO | 16/12/2019 | Actualizada ás 15:54
A Cátedra do Pan e do Cereal da USC, promovida en colaboración co Grupo Dacunha, premiou a tres proxectos sobre cultivos e alimentación saudable dentro da súa convocatoria de mención aos TFG e TFM, dotada con 1.750 euros e unha bolsa de emprego por un período de seis meses no Grupo Dacunha.
A celiaquía e a achega de alternativas para sortear as limitacións propias das persoas que sofren intolerancia ao glute está no xerme proxecto presentado polo graduado en Enxeñaría Agrícola e Agroalimentaria da Escola Politécnica Superior de Enxeñaría (EPSE) Roberto López Toja, no TFG 'Panificadora de pan precocido conxelado para celíacos, produción de 4.000 quilos día situado no polígono de Alvedro'.
A proposta empresarial de López Toja, premiada neste certame con 1.000 euros, ademais da posibilidade dun contrato laboral no Grupo Dacunha, ten en conta os "rigorosos mecanismos de control" durante todo o proceso de elaboración do pan, desde a moenda do cereal, a fase de amasado, cocido e distribución, que reportan maiores garantías cara ao consumidor.
O proxecto integra así mesmo unha serie de técnicas innovadoras aplicadas ao método tradicional de panificación, como é o emprego de masa nai, á vez que documenta polo miúdo nos procesos de construción e edificación da industria "pautas de máximo respecto a parámetros relacionados coa seguridade e a saúde".
POBOACIÓN SÉNIOR
A alimentación saudable entre a poboación sénior e a súa inxesta de pan centra o TFG realizado polo graduado en Nutrición e Dietética Javier Cancela Rodríguez. O autor deste traballo, que recibiu os 500 euros do segundo premio, fai unha radiografía, a partir de 150 enquisas con cuestionario deseñado e validado, dos hábitos de consumo de pan entre a poboación sénior, así como dos cambios experimentados respecto do consumo deste alimento ao longo da vida.
Finalmente, o terceiro premio outorgado nesta convocatoria pola Cátedra do Pan e do Cereal Dacunha da USC, dotado con 250 euros en metálico, recaeu no graduado en Enxeñaría Agrícola e Agroalimentaria na EPSE Rafael Abad Trasancos, polo TFG titulado 'Avaliación do desenvolvemento de distintas especies e variedades de cereal baixo diferentes condicións de sombra'.
