A Fiscalía pide dividir a Pokémon segundo as "tramas existentes" e que se instrúan en xulgados galegos 32 pezas
O Ministerio público busca evitar "un único xuízo" con "250 acusados" ao non existir "conexidade procesual" entre os asuntos
Por Europa Press / Redacción | SANTIAGO DE COMPOSTELA | 23/01/2020 | Actualizada ás 17:01
A Fiscalía Provincial de Lugo propuxo dividir a causa da Operación Pokémon segundo as "distintas tramas existentes", correspondentes aos diferentes procedementos de adxudicación de obras e servizos, de forma que se instrúan en distintos xulgados galegos un total de 32 pezas.
Segundo explicaron fontes do Ministerio público, a Fiscalía Provincial de Lugo trasladou esta proposta a través dun escrito remitido o pasado 14 de xaneiro ao Xulgado de Instrución número 1 de Lugo, da xuíza Pilar de Lara.
A Fiscalía propón que a causa se reparta "en atención aos lugares" dos que proveñen os asuntos, "tanto respecto daqueles feitos que radican fóra" de Galicia (en relación aos correspondentes a Baleares e Cataluña), como aos relacionados con cuestións sucedidas aquí.
Así, aposta por que se remita cada asunto ao xulgado de instrución decano que corresponda segundo se sitúe "a institución ou administración pública contratante" tendo en conta que, conforme sinala, "nada teñen que ver as operacións levadas a cabo en cada lugar".
UN TOTAL DE 32 PEZAS
No que respecta a Galicia, solicita que se incoen nos xulgados que proceda as correspondentes dilixencias previas dun total de 32 asuntos ao considerar que "non existe conexidade procesual" que xustifique que se axuicen conxuntamente todos eles.
O obxectivo do Ministerio público con esta proposta é evitar a celebración dun "único xuízo oral no que figurarían uns 250 acusados" e que "obrigaría a un único órgano" —neste caso a Audiencia de Lugo— a coñecer de asuntos "para os que carece de competencia tanto territorial como obxectiva".
