En Marea sitúase como "o único partido progresista galego" que pode pór "os puntos sobre os íes" ao Goberno
Chama á "cooperación preelectoral" para "tecer alianzas amplas" que permitan acabar co "réxime decrépito" do Goberno de Alberto Núñez Feijóo, pero exclúe a Podemos e Esquerda Unida deses pactos antes das eleccións.
Por Europa Press / Redacción | SANTIAGO DE COMPOSTELA | 02/02/2020 | Actualizada ás 13:43
O portavoz de En Marea, Luís Villares, considera que o seu partido é "a única forza progresista galega" en situación de "pór os puntos sobre os íes" ao Goberno respecto das medidas que deben porse en marcha en Galicia, xa que Podemos, PSOE e BNG teñen "ataduras" polos seus pactos.
Así é como se sitúa En Marea de cara ás eleccións galegas, unha cita que "acabará co réxime decrépito" do PPdeG que "ten os días contados", segundo as palabras de Villares este domingo nunha entrevista na Radio Galega.
Sobre os comicios, o portavoz do partido tamén explicou que a súa formación "está disposta a dialogar para chegar a acordos" coa "intención" de que os seus votos "somen eficazmente" a construír unha "maioría de progreso", ben sexa en solitario ou con outras forzas.
Con todo, o tamén deputado non deixou claro cales son eses outros partidos cos que quere establecer acordos. Aínda que non negou contactos con BNG e Anova, prefire "reservarse" o contido das súas conversas e os pasos que se irán dando ata que se convoquen as eleccións, sobre as que "supón" que Feijóo non adiantará porque "non lle interesa equiparar o momento político ao debate de Cataluña".
O seu partido tratará de construír para esa cita un "espazo progresista galego ecoloxista, feminista e social" e dentro deses principios caben todas as forzas políticas progresistas galegas "soberanas", o que excluiría a Podemos e Esquerda Unida, xa que "dependen doutras forzas estatais que no pasado demostraron someter calquera acción política en Galicia ao seu partido" en Madrid.
Por este motivo, as "políticas de alianza" con eles quedarían para "despois das eleccións", explicou Villares respecto diso. En calquera caso, o político e maxistrado asegurou que non porá "liñas vermellas", límites que "casan mal coa política actual" e fixo un chamamento á "cooperación preelectoral" para "tecer alianzas amplas" que respondan a "a vontade cidadá".
"HORIZONTE DE ESPERANZA" FRONTE AO PPDEG
Ten "moi claro" que "os dereitos das maiorías sociais van por diante" das siglas do partido e "a xente xa non quere máis políticas de Núñez Feijóo" no ámbito sanitario, exemplificou. Para poder enfrontarse ao PPdeG sabe que "as alternativas a Feijóo" pasan por "dialogar necesariamente".
Luís Villares destacou o "perigo" que supón que o Partido Popular revalide o Goberno en Galicia. "Hai nada o PP dicía que non pactaba con ninguén e agora está con Vox", critica. Igualmente acusou o PPdeG de "votar en contra de medidas que pretenden que o discurso do partido de ultradereita penetre en Galicia.
"O PP vota en contra" de iniciativas para combater "a homofobia, o machismo" e tamén contra o que favorece "o autogoberno en Galicia", algo que para el "desacredita o discurso de Núñez Feijóo".
Fronte a isto, En Marea trata de "ofrecer un horizonte de esperanza" tamén a día de hoxe desde o Parlamento galego, onde queren ter "reflexo institucional" a través da constitución dun grupo propio despois de que a deputada Mariló Candedo se desmarcase de Común da Esquerda para situarse con Villares.
INDUSTRIA E IVE
En canto a outros asuntos da actualidade política como a demanda do IVE ao Estado por parte das Comunidades, Villares considera que "a vía xudicial acabará mal" e propón "unha modificación da norma cunha disposición adicional con carácter retroactivo" para que sexa posible a transferencia dos 200 millóns de euros que corresponden ao pago do IVE en Galicia.
Asegura que a lexislación actual "é materialmente inxusta" e culpa o PP de que así sexa, xa que foi Cristóbal Montoro, cando era ministro, o que modificou a lei para que non se puidese entregar ese diñeiro pasados dous anos da súa habilitación. Neste sentido, acusa o PPdeG de utilizar este caso como "un motivo de confrontación co PSOE" e non como "a vontade de ter máis recursos para Galicia".
En canto á situación das industrias electrointensivas cre que é necesario "acabar cos lobbys eléctricos" a través dunha nova regulación do sector eléctrico no que se "insira o Estatuto para as electrointensivas", aínda que cre que "isto non vai suceder" porque antigos políticos como Felipe González ou José María Aznar forman parte destes lobbys e "presionarán aos seus partidos" para que non expoñan estas medidas.
Por outra banda, "En Marea dá por pechada a térmica e ten que ser así. É inviable en termos de contaminación", pero a xuízo de Villares "isto sabíase hai dez anos e a Xunta non fixo nada". Por este motivo, aposta por dous mapas de transición sustentables, un en Cerceda e outro na comarca de Ferrolterra, para "desenvolver un pull industrial de ensamblaxe de fabricación de enerxía eólica mariña" e construír "os motores" e non só as plataformas dos muíños. Segundo el, Galicia ten "o mellor capital humano, as mellores instalacións e capacidade para facelo".
