Pachi Vázquez anuncia que Espazo Común se presentará ás autonómicas para "dar voz a Ourense"
Ve como "o ideal" incorporar procesos de coalición e están abertos "a incluír na súa candidatura a colectivos sociais, culturais e veciñais".
- A Fiscalía pide 10 anos de inhabilitación para Pachi Vázquez por prevaricación
- Pachi Vázquez ficha para o seu proxecto político a María Rey, exconcelleira de Ciudadanos en Pontevedra
Por Europa Press / Redacción | SANTIAGO DE COMPOSTELA | 18/02/2020 | Actualizada ás 16:28
Espazo Común, o partido presidido polo que fora secretario xeral dos socialistas galegos, Pachi Vázquez, anunciou que se presentará ás eleccións autonómicas do próximo 5 de abril co "único obxectivo de dar voz a Ourense".
Así o manifestou o propio Pachi Vázquez durante a rolda de prensa celebrada este martes en Ourense para dar a coñecer que a formación política ten "completamente tomada" a decisión de participar nas autonómicas, de maneira singular na provincia de Ourense, pero tamén por parte dos seus compañeiros de Pontevedra.
Así, o presidente de Espazo Común sinalou que "o ideal sería incorporar procesos de coalición". Por este motivo, mostráronse abertos a "incluír na súa candidatura a colectivos sociais, culturais e veciñais que velen polos intereses de Ourense".
Por parte desta formación política mostráronse "conscientes" do escaso tempo do que dispoñen para calquera posible coalición, pero animan a que "participen con eles" todos aqueles que "xoguen só por Ourense".
"A Galicia baleirada resólvese cando nos xuntamos, alcanzamos representación parlamentaria e cambiamos a situación", sinalou Francisco Fraga, concelleira da formación en Piñor, para animar a "colectivos ourensáns a unirse e dar un salto cualitativo".
PACHI VÁZQUEZ NON SERÁ CANDIDATO
A formación decidirá nos próximos días quen encabezará a candidatura, pero todo apunta a que esta "persoa clave para eles" será Francisco Fraga. O que si deixaron claro este martes é que o seu candidato non será Pachi Vázquez. "A min agora tócame remar e empuxar. Esta é unha decisión que me excede absolutamente e son todos os meus compañeiros os que se botaron ás súas costas a responsabilidade de sacar este proxecto adiante", anunciou Vázquez.
OBXECTIVO "OURENSE"
Por parte de Espazo Común insistiron en deixar claro que "non teñen o obxectivo de gañar as eleccións autonómicas", senón que "a clave é que Ourense alcance representación no Parlamento de Galicia".
Este proxecto xorde das "ganas, a ilusión e a necesidade de facer algo por esta provincia", sinalou Francisco Fraga. Para cambiar a situación de Ourense apelan á "decisión política" no Parlamento de Galicia.
O concelleiro de Espazo Común en Piñor tamén manifestou que "continuamente se suceden diagnósticos por parte de todas as formacións políticas da mala situación da provincia de Ourense, pero con repetilo constantemente non chega".
LIÑAS VERMELLAS
A única liña vermella que marcan desde Espazo Común para calquera posible pacto, no caso de obter representación no Parlamento de Galicia, "chámase Ourense". "Se nós temos a chave, os que queiran gobernar Galicia terán que pasar por Ourense", declarou Pachi Vázquez.
A pesar de que desde o partido teñen as súas propias "preferencias ideolóxicas" sinalaron que "non se fían nada" por mor do que están a ver. Neste sentido, Pachi Vázquez aludiu ao PSOE para sinalar que "neste momento Galicia ten un problema porque non existe un PSOE galego senón unha sucursal de Ferraz".
CAMBIOS NO PANORAMA ELECTORAL
Preguntado por posibles cambios no panorama electoral, Pachi Vázquez sinalou que "a dereita segue sendo unha forza moi hexemónica" e que "o PSOE non gaña porque non ten un proxecto para Galicia".
Neste contexto destacou dous factores "moi importantes" do actual presidente da Xunta de Galicia e candidato do PP, Alberto Núñez Feijóo. Por unha banda, "ser capaz de meter no imaxinario popular que el é o que está a parar a Ciudadanos e Vox en Galicia" e, por outra banda, unha convocatoria de eleccións que "pilla bastante despistado a todo o mundo, sobre todo á esquerda".
