A primeira Vía Verde da provincia da Coruña conectará Cerceda con Santiago cunha senda de 36,5 quilómetros

A primeira Vía Verde da provincia da Coruña conectará Cerceda con Santiago cunha senda de 36,5 quilómetros sobre as antigas vías do ferrocarril, segundo informa a Deputación coruñesa.

Fíxoo coincidindo coa visita que o presidente provincial, Valentín González Formoso, realizou este xoves a Cerceda, na que confirmou que o organismo provincial xa terminou a redacción dos proxectos e conta coas autorizacións pertinentes para licitar as obras.

Será, segundo a institución provincial, a máis longa de Galicia "e contribuirá a vertebrar os núcleos da zona". Tamén subliña que terá "unha importante repercusión turística e socioeconómica para os cinco concellos polos que discorrerá".

Na visita, Formoso ofreceu tamén ao novo rexedor, Juan Manuel Rodríguez —que substituíu no cargo a José García Liñares tras a dimisión deste último— "o apoio e a colaboración da Deputación" para abordar actuacións neste municipio.