Feijóo destaca a chegada de 60.000 test rápidos do Goberno central e recoñece atrasos no seu material

Por primeira vez en moito tempo o presidente da Xunta, Alberto Núñez Feijóo, agradeceu a chegada de 60.000 test rápidos remitidos polo Goberno central que terían que chegar a Galicia entre este domingo e o luns. “Sería o mellor material recibido desde que iniciou a pandemia”, asegurou nunha rolda de prensa telemática onde tamén recoñeceu atrasos do material que comprou a propia Xunta, tanto das máscaras –prometera 8 millóns e hai menos de 4 en Galicia-- e, especialmente, respiradores para as UCIs.

Con todo, o presidente galego advertiu que o material recibido por parte do Estado soamente supón "aproximadamente o 10 por cento" do consumido desde o inicio da pandemia, mentres que a Xunta, segundo estas cifras, comprou o 90 por cento restante. “O máis importante é que imos recibir eses 60.000 test e iso sería o mellor que recibiriamos desde o inicio da pandemia”, dixo.

Estes test, que dan resultados en 15 minutos, serán destinados a facer probas nas residencias de anciáns e de persoas discapacitadas, a persoal sanitario e tamén ás forzas de seguridade do Estado. Con todo, Feijóo aclarou que ás persoas negativas se lle fará unha segunda proba con PCR para descartar completamente que a persoa estea contaxiada.

A pesar de recibir este material de Madrid, o líder do PP galego criticou que do goberno de Madrid só recibiu 412.000 máscaras, “o que dá sete días de consumo”, 35.000 batas “para 1,9 días e guantes para 1,5 días de consumo”. “A día de hoxe poden chegar máis máscara enviadas polo Goberno central”, dixo.

MATERIAL DA XUNTA

Galicia recibe material do Goberno central pero non da Xunta, especialmente, máscaras e respiradores. A día de hoxe Galicia recibiu menos da metade das oito millóns de máscaras prometidas por Feijóo hai 20 días, así como dos respiradores. Por iso, agora, Feijóo é prudente á hora de falar. “Fixemos unha compra por riba deses 270 respiradores e non foron entregados e non imos crear falsas esperanzas. Non creo que sexa prudente dar información sobre cousas que se prepagan e logo non chegan. Nós cando chegan aquí o decidimos”, xustificou agora.

Neste sentido, aclarou que esta fin de semana está previsto que cheguen medio millón de máscaras máis e achacou os problema ás “tensións internacionais” nas compras. Por iso, e tras os problemas con Turquia, destacou que “agora hai que ter unha boa relación con China”. “É un erro activar un recelo contra ese país porque sirve de material á maior parte do mundo. Hai tensións pero hai que manter respecto sobre todo por quen constrúe máis material do mundo”, dixo.

Con todo, aproveitou para volver criticar ao Goberno español. “Se hai respiradores que se fan noutros lugares de España, a nós non nos chegaron e do Goberno central non temos. Só nos deu instrumentos para a apnea do sono”, criticou.

TEST REALIZADOS

Por outra parte, o presidente galego destacou que, a día de hoxe, a Xunta realizou 28.000 test e xa se superou a barreira dos 2.000 test por días. “E cantos máis realicemos con carácter preventivo, mellor. Por iso é bo que cada autonomía dea estes datos para ver tamén os datos reais”, dixo.