A reciclaxe de plástico, papel e cartón aumenta un 25% en marzo
Así o constatan Xunta e Ecoembes.
Por E.P. | SANTIAGO DE COMPOSTELA | 04/05/2020 | Actualizada ás 14:00
A recollida selectiva de envases experimentou en Galicia durante o mes de marzo un incremento de máis do 25% respecto ao mesmo período do ano anterior.
Así o constatou este luns a conselleira de Medio Ambiente, Ángeles Vázquez, durante unha videoconferencia co director xeral de Xestión Local e Autonómica de Ecoembes, Anxo Hervella, e o xerente da entidade para a Zona Norte, Fernando Blázquez, co fin de coñecer como está a funcionar este servizo durante o estado de alarma derivado da COVID-19.
Neste sentido, os responsables de Ecoembes para Galicia explicaron que o confinamento da poboación e as restricións impostas debido ao coronavirus non se están reflectindo negativamente nas cifras de reciclaxe dos colectores amarelos e azuis.
De feito, subliñaron que, durante a segunda quincena do mes de marzo, coincidindo co inicio do estado de alarma, se recolleu preto dun 10% máis de envases que no mesmo período de 2019, a pesar da paralización do sector da hostalaría.
A este respecto, Hervella e Blázquez confirmaron que o servizo de recollida selectiva, declarado esencial durante o estado de alarma, está a se prestar en Galicia sen incidencias e con normalidade desde marzo. Ademais, Ecoembes mantén o contacto permanente coas plantas que reciben e tratan o material seleccionado para garantir a súa correcta reciclaxe.
