Restos de pélets volven a aparecer en máis de 20 praias de Galicia
Detectan microplásticos en varias praias do Barbanza e a Xunta inicia seguimento en areais da comarca.
Por Europa Press / Redacción | SANTIAGO DE COMPOSTELA | 15/02/2025 | Actualizada ás 11:34
A Xunta comunicou que realiza un seguimento das praias na comarca do Barbanza para comprobar o seu estado ante a "aparición puntual" de pélets nalgunhas delas. Nunha nota de prensa, a administración autonómica sinala que constatou a presenza "testemuñal" de granulados plásticos de pequenas dimensións nalgúns areais, á vez que procedeu a retiralos, polo que, engadiu, "están a realizarse visitas sobre o terreo noutras zonas para avaliar a situación e calibrar de maneira global as dimensións deste episodio".
Así, A Consellería de Medio Ambiente e Cambio Climático explicou que ten planificada a visita de ao redor dunha vintena de praias durante estes días co obxectivo de coñecer o seu estado e determinar se se amplía o radio de acción máis aló da comarca do Barbanza.
Segundo detallou, trátase dunha medida preventiva que ten como fin estar preparados para actuar "coa máxima celeridade" en caso de atoparse zonas con maior concentración de pélets. En función do resultado desas comprobacións e da magnitude da situación, o departamento autonómico decidirá se é conveniente adoptar outras medidas como a posible activación do Plan Territorial de Continxencias por Contaminación Mariña Accidental de Galicia (Plan Camgal) en fase de alerta ou o envío de mostras a laboratorio para determinar se se trata de restos da mercadoría perdida polo buque mercante Toconao fronte ás costas de Portugal en decembro de 2023 ou teñen unha orixe diferente.
Pola súa banda, a Consellería asegurou que o Servizo de Gardacostas de Galicia non ten constancia de ningún aviso. Neste contexto, a Xunta apela á "responsabilidade" e pide "prudencia" ante este episodio á espera de contar con máis detalles sobre a súa dimensión, á vez que defende a necesidade de que todas as administracións competentes "actúen con dilixencia e informen" o Executivo autonómico en caso de contar con datos relacionados con esta cuestión.
