Sete viaxes multimedia pola Galicia que deixou escrita Otero Pedrayo
O Consello da Cultura Galega presenta 'Os quixotes da terra van de camiño', un proxecto para visibilizar o legado da Xeración Nós no seu centenario.
Por Europa Press / Redacción | SANTIAGO DE COMPOSTELA | 09/05/2020 | Actualizada ás 11:34
No marco dos proxectos para celebrar o centenario da Xeración Nós, o Consello da Cultura Galega presenta 'Os quixotes da terra van de camiño', con sete viaxes multimedia por Galicia a partir de manuscritos que Ramón Otero Pedrayo deixou na década dos 60 ao seu amigo Silvio Santiago, coñecido entre a emigración en Venezuela.
En concreto, esta iniciativa emprega a plataforma 'Arcgis', que facilita construír narrativas a partir da xeolocalización do usuario, de modo que ofrece os itinerarios tal e como os concibiu o intelectual galeguista. Durante a ruta, o usuario pode consultar os seus manuscritos e ler as súas transcricións mentres realiza a viaxe multimedia seguindo os pasos do propio Otero Pedrayo.
Este proxecto, que recibirá cada sábado unha nova proposta a través deses manuscritos, iniciarase co itinerario 'O día de Pastor Díaz', que comeza no sepulcro de Rosalía de Castro, en Santiago, onde propón cantar o himno galego, e termina en Viveiro (Lugo) cun paseo pola Praia dos Castelos, facendo un total de 228 quilómetros.
'Os quixotes da terra van de camiño' forma parte do proxecto 'Nós: de onte a hoxe', co que o Consello da Cultura pretende non só dar a coñecer as figuras da Xeración desde que a revista 'Nós' se creou en Ourense, en 1920, senón tamén recoller documentais, gráficos e biografías de personalidades para mostrar a pegada que deixaron estes galeguistas na cultura.
