O Sergas recomendou restrinxir o uso de máscaras nos hospitais nos momentos máis duros da pandemia

O Sergas deu unha recomendación xeral ás áreas sanitarias para evitar o uso de máscaras cirúrxicas e máscaras FFP2 nos hospitais galegos, agás situacións puntuais, durante os momentos iniciais e máis duros de transmisión da COVID-19.  De feito, ía máis alá nas súas recomendacións e apelaba á “responsabilidade profesional, social e moral” para o “correcto uso das mesmas dada a situación de limitación de existencias”.

Así, aconteceu, cando menos, nas áreas sanitarias de Santiago-Barbanza, Vigo e Ourense, Verín e O Barco. Así, as xerencias só recomendaban o uso das máscaras cirúrxicas durante o contacto con pacientes con sintomatoloxía respiratoria “con diagnóstico de COVID-19” así como nas indicacións habituais de “uso cirúrxico, partos, procedementos invasivos e illamentos por gotas en enfermidades como gripe”.

No caso das máscaras FFP2 o seu uso era recomendable na realización de técnicas e procedementos diagnóstico-terapeúticos que xeren aerosois e en indicacións habituais como “illamento de transmisión aérea como tuberculose”. Tamén durante o contacto con casos “probables/confirmados de COVID-19 a menos de 2 metros sempre que exista dispoñibilidade das mesmas”. En caso contrario, o Sergas aconsellaba o uso de máscaras cirúrxicas.

E o uso de calquera destas dúas máscaras era descartado para as “actividades e lugares que non impliquen contacto directo con pacientes que non formen parte das indicacións mencionadas anteriormente, nin en desprazamentos polo centro e áreas xerais”.

Sanitaira prepara unha sala de exploración | Fonte: EP

TAMPOUCO O SEU USO NA ATENCIÓN AO PÚBLICO

O Sergas tampouco indicaba o seu uso para circular polas instalacións dos hospitais ou para utilizar no ascensor, para o reparto de material, para atender aos usuarios, sen síntomas respiratorios detrás dunha mesa ou mostrador e, especialmente, “nas probas de diagnóstico por imaxe, consultas a pacientes, toma de mostras sanguíneas, etc... sen síntomas respiratorios”.

Ademais non estaba aconsellado para o persoal de mantemento ou de limpeza en habitacións convencionais e para o persoal de cociña que “usará as mascarillas hixiénicas –de papel-- para a protección dos alimentos segundo o procedemento”.

CRÍTICAS

Nos últimos días, sindicatos como  UGT, Prosagap, CIG, CC.OO., o Sindicato de Enfermería Satse ou entidades como a Asociación Galega para a Defensa da Sanidade Pública (AGDSP) criticaron duramente á xerente da Área Sanitaria de Compostela e Barbanza, Eloína Núñez, tras dicir que os sanitarios contaxiáronse, primeiro, en “congresos” aos que asistiron, e logo nas salas de café dos centros hospitalarios. Unhas palabras que acenderon o ánimo de sindicatos, profesionais e asociacións que mesmo piden a súa dimisión.

De feito, a propia Eloína Núñez asinaba o pasado 18 de marzo, tres días despois de decretarse o Estado de Alarma, unha orde na que non recomendaba o uso xeral de máscaras entre os sanitarios. "Agás naquelas actuacións con pacientes con sospeita ou confirmación de COVID-19 ou patoloxía de tipo respiratorio, non é necesario o uso xeral de mascarillas”, recollía esta orde na que “non recomendaba” tampouco o emprego da máscara nos “desprazamentos internodos centros sanitarios,.

Un profesional sanitario acompaña a unha persoa maior nun hospital | Fonte: EP