Denuncian que planta láctea visitada por Feijóo tenta baixar o prezo de compra ós gandeiros

O responsable de Servizos de Unións Agrarias (UUAA), Óscar Pose, denunciou que industrias lácteas -en concreto, Inleit e Lactalis- expuxeron a modificación de contratos con produtores galegos para "baixar" o prezo de custo do leite pese ao incremento da demanda. Durante unha rolda de prensa celebrada este xoves de modo telemático, Pouse defendeu que o aumento da demanda que tivo lugar durante os primeiros meses deste ano supón que "non exista nin unha soa razón de mercado" que "xustifique" as propostas de industrias para baixar o prezo de custo do leite.

En concreto, criticou que a empresa Inleit, asentada nun polígono de Curtis visitado por Feijóo o pasado día 23, busca substituír o custo fixo acordado nos contratos "por un prezo variable", así como introducir "unha baixada media de ao redor de 2 céntimos por litro", o que advertiu que a súa organización "non vai permitir".

CONTRATOS "DE TRES MESES" E SEN GARANTÍAS

Nun sentido paralelo, Pose criticou que Inleit propuxese a realización de contratos de "tres meses" a pesar de que a normativa establece que deben alcanzar o ano de duración. Así, denunciou que os produtores dispoñen de contratos de doce meses de vixencia asinados nos que se reflicten uns "prezos superiores" e que estes "se tentan romper". Ademais, advertiu de que a substitución dos marcos contractuais por uns novos de tres meses de duración non garante a renovación destes últimos tras a súa finalización, polo que "deixa desprotexidos" aos produtores.

Ante esta situación Pose reprobou ó Presidente da Xunta e a empresa que trasladasen no marco da súa instalación o papel "de referencia para o sector lácteo" da planta. En troques, o responsable de UUAA destacou a  necesidade de dispor de compañías "serias" que "aposten polo sector", en lugar de contar con empresas que "rompan os contratos á mínima para gañar máis diñeiro". Por iso, reclamou "sancións" para as que non cumpran a normativa e que o Goberno galego "non mire para outro lado".

INLEIT

Pola súa banda, a empresa Inleit Ingredients destacou que ofrece "un prezo mínimo" por litro de leite aos seus provedores para achegarlles una "certa estabilidade" mediante os novos contratos expostos, así como que estes garanten un incremento do custo base cando mellore a situación do mercado en Europa.

Inleit tamén afirmou que os contratos propostos ás explotacións agrarias garanten "un prezo mínimo aos seus provedores de leite e a recollida dos litros acordados" e destacou que a maior parte daqueles cuxos acordos venceron o 30 de xuño, 53, "xa asinaron as novas condicións". Mentres, explicou que se comezou a informar as modificacións aos 146 provedores restantes e comprometeu que "as bases e cláusulas serán iguais para todas as explotacións coas que traballa".

A empresa láctea tamén remarcou que os contratos renovados contemplan "un prezo variable cun mínimo garantido" de 29 céntimos por litro de leite, aos que se engadirán "primas de volume, calidade hixiénica, graxa e proteína e outras variables estipuladas". Do mesmo xeito, Inleit asegurou que estas condicións permitirán aos 200 provedores cos que conta en Galicia "non estar a expensas do que dite o mercado, nun momento especialmente delicado pola forte incerteza".

Así mesmo, a explotación radicada en Curtis defendeu que presenta un proxecto "a longo prazo" con "un forte compoñente internacional e unha proxección esencialmente exportadora". Para iso, segundo subliñou, resulta "clave" asegurar "certa estabilidade" a produtores, que exercen como o "primeiro elo da cadea".

Neste sentido, Inleit resaltou a decisión adoptada para "priorizar e garantir un prezo mínimo por litro de leite a todas as explotacións lácteas" co obxectivo de que "os posibles vaivéns do mercado a curto prazo repercutan en menor grao" aos seus provedores. Ademais, a empresa láctea apuntou que a duración trimestral dos novos contratos será "prorrogable automaticamente, salvo renuncia expresa dunha das partes".

Tamén detallou que estes acordos garanten un incremento do prezo base "desde a súa entrada en vigor" mediante "indexación, verificable, obxectiva e independente" cando o custo do leite alcance "niveis anteriores á crise da COVID-19" na Unión Europea (UE).