A Xunta agardou a despois das eleccións para recortar á metade unha subvención para protexer o galego
A partida, dedicada ó fomento da lingua nos concellos, pasou de 245.000€ a 100.000€. A resolución das axudas foi publicada 4 días despois dos comicios cando o habitual é que se resolva en xuño, segundo denuncia A Mesa.
Por Galicia Confidencial | SANTIAGO DE COMPOSTELA | 20/07/2020 | Actualizada ás 14:12
Poucos días despois de que Alberto Núñez Feijóo estreara a súa cuarta maioría intercalando o galego co castelán no discurso da noite electoral, a Xunta, a través da Secretaría Xeral de Política Lingüística, recortaba en case un 60% unha das principais dotacións para a salvagarda e fomento do galego.
En concreto, e segundo publica o DOGA do 16 de xullo, a partida dedicada ó fomento do galego nos concellos da comunidade baixou dos 245.000€ a apenas 100.000, un descenso que deixa a subvención para cada consistorio en apenas 320€, como dá conta o responsable da Mesa pola Normalización Lingüística Luís Pérez na súa conta de Twitter.
A @Xunta e a @SXPL recortan as axudas a concellos para promoción do galego, pasando de 245.000€ a 100.000€.
— Luís Pérez Barral (@sinhoGZ) July 16, 2020
Tocaría a menos de 320€ por concello... este é o interese do goberno galego en promover a lingua galega.
O anuncio do recorte, pois, fíxose público apenas 4 días despois da reelección de Alberto Núñez Feijóo, unha circunstancia que afean dende a organización ."A resolución destas subvencións adoita ter lugar en xuño, pero neste caso foi atrasada coa pandemia como xustificación", apunta Luís Pérez.
Con todo, o descenso das contas non é unha novidade nin veu motivado exclusivamente pola covid-19, segundo reflexiona Pérez. "Nos últimos anos asistimos a un recorte progresivo deste e outros orzamentos que deixan claro que Feijóo non ten interese en protexer o galego", apunta. Neste sentido, destaca que en 2014 o orzamento chegaba ós 300.000€. "A situación é moi mala", coincide o presidente da Mesa, Marcos Maceira: "hai territorios con linguas non oficiais nas que a dotación é máis alta".
