Turistas e emigrantes que veñan de zonas con alta incidencia de Covid-19 terán que rexistrarse obrigatoriamente
Deberán facelo no teléfono de atención do coronavirus (881 00 20 21) ou a través da web coronavirus.sergas.gal. Con todo, a Xunta non estipulou aínda un réxime de sancións
Por Europa Press / Redacción | Santiago de Compostela | 23/07/2020 | Actualizada ás 14:20
Os viaxeiros que cheguen a Galicia procedentes de zonas de "alta" incidencia de coronavirus, xa sexa doutras comunidades españolas ou do estranxeiro, deberán notificar "con carácter obrigatorio" os seus datos de contacto e tempo de estancia. Este trámite será de obrigatorio cumprimento a turistas, a galegos que volvan das súas vacacións ou a emigrantes que veñan a ver á familia, así como a empresarios que viaxen por motivos de negocio nos últimos 14 días.
Diso informou este xoves o presidente do Goberno galego, Alberto Núñez Feijóo, quen destacou que esta medida ten como obxectivo o "diagnóstico precoz" e estar "preparados para detectar con carácter rápido" ás persoas que estean infectadas.
Así, os viaxeiros deberán notificar a súa viaxe a través do teléfono de atención do coronavirus (881 00 20 21) ou a través da web (coronavirus.sergas.gal).
A próxima semana publicarase a listaxe de lugares de risco con datos "obxectivos". Os viaxeiros que estivesen polo menos 14 días deberán comunicalo, mentres que para o resto de visitantes será voluntario. Con todo, a Xunta aínda non estipulou un réxime de sancións en caso de incumprimento desta norma de obrigado cumprimento.
De feito, Alberto Núñez Feijóo avanzou que, en función do lugar de procedencia, pódense facer PCR a persoas sen síntomas.
INFORMACIÓN DE ESTABLECEMENTOS TURÍSTICOS
Pola súa banda, os establecementos de aloxamento turístico estarán obrigados a informar desta medida aos seus clientes, do mesmo xeito que as axencias de viaxe, operadores turísticos e compañías de transporte aéreo, marítimo ou terrestre. Pola súa banda, tamén deberán facelos as empresas que trasladen a Galicia traballadores por motivos laborais.
A todos os viaxeiros facilitaráselles un contacto por se teñen algunha sintomatoloxía. Os residentes a través do seu médico de cabeceira e os fóraneos mediante o número de atención do coronavirus.
