A Autoridade Portuaria cede ao Concello de Ferrol a superficie dos seus terreos na Malata e A Cabana

O Concello de Ferrol e a Autoridade Portuaria Ferrol-San Cibrao acordaron a cesión durante dez anos ao consistorio ferrolán dos terreos da zona da Malata e A Cabana, un total de 250.000 metros cadrados valorados en 14 millóns de euros pola Intervención Xeral do Estado.

Este acordo foi presentado este venres polo alcalde de Ferrol, Ángel Mato, e o presidente da Autoridade Portuaria, José Manuel Vilariño, nunha das superficies que serán de titularidade municipal grazas a este acordo, como é o aparcadoiro do estadio da Malata.

O alcalde de Ferrol lembrou que se trata dun asunto que estaba pendente na cidade porque xa na súa etapa de concelleira de Urbanismo no ano 2007 "falouse de incorporar estes espazos ao concello".

Mato destacou "o esforzo e o diálogo" do que sae este acordo nunha etapa na que, di, "é máis importante que nunca sumar esforzos". "Non é un gran día para o goberno, senón un gran día para Ferrol", apostilou.

Deste xeito, Concello de Ferrol será titular durante o próximos dez anos desta superficie "que xa non lle é útil á Autoridade Portuaria" e que foi distribuída en tres zonas, o que permitirá que o consistorio xa non teña que pedir permiso á Autoridade Portuaria cada vez que queiran facer actuacións nesta zona do litoral ferrolán.

Nos termos económicos do pacto, o Concello de Ferrol queda exento de abonar as taxas anuais pola utilización destas superficies, tras a finalización da concesión coa Autoridade Portuaria o pasado 10 de xullo e que databa de 1990 para o uso destas superficies, mentres que a Autoridade Portuaria non terá que pagar as taxas municipais de bombeiros, que serán sufragadas polo consistorio ferrolán.

ÁREAS

A primeira zona ocúpaa o estadio da Malata, as instalacións das súas inmediacións e o seu aparcadoiro. A segunda zona está ocupada polo pavillón da Malata, a pista de atletismo, o campo de rugby e as pistas de tenis e pádel.

A terceira área está formada polos terreos que ocupa a asociación de veciños da Cabana, o parque infantil, a estación de bombeo, unha parte do paseo marítimo da Cabana e a igrexa, ademais doutros 37.000 metros cadrados actualmente ocupados por infraestruturas viarias.

O alcalde de Ferrol deu a coñecer algunhas das melloras que foron proxectadas para estas superficies cedidas, como son as obras de reacondicionamiento do paseo marítimo da Malata ou a creación dun miradoiro na estrada alta do Porto.

En canto ás instalacións deportivas "serán adaptadas" para ter a posibilidade de albergar grandes eventos "non só a nivel local, senón tamén a nivel galego e nacional".