A actividade económica galega crece un 3,4% en xaneiro, segundo o Indicador Abanca-Foro Económico
Por Europa Press / Redacción | SANTIAGO DE COMPOSTELA | 31/03/2025 | Actualizada ás 10:58
A actividade económica galega creceu un 3,4% en xaneiro, respecto ao mesmo mes de 2024, segundo o Indicador Abanca-Foro de Conxuntura Económica de Galicia, que sinala que este valor se mantivo constante respecto de decembro do ano pasado.
Nun comunicado, o Foro Económico explica que este comezo de ano permite albiscar un exercicio non exento de incerteza económica e política. "Son moitos e moi variados os ámbitos que condicionarán a evolución económica internacional e nacional en 2025, polo que está por ver se a economía galega é capaz de consolidar este valor", indicou.
Con todo, destacou a "fortaleza" da economía española, crecendo un 3,2% en 2024. As previsións institucionais para este ano apuntan a un crecemento de España de ata o 2,8%, grazas á demanda interna e ao investimento. En cando a Galicia, "cabe esperar un comportamento á vez ou lixeiramente inferior".
En canto á evolución individual das variables do Indicador, son nove as que soben (unha máis que o mes anterior). Entre as que mellor comportamento mostran están as turísticas (transporte de viaxeiros e viaxeiros en hoteis) cun incremento próximo ao 5% interanual. No lado negativo, a produción de turismos cae nos últimos 12 meses, baixando máis dun 15%.
