Galicia non "ten capacidade para tratar adecuadamente" aos menores migrantes, segundo Rueda

O presidente da Xunta de Galicia, Alfonso Rueda, confirmou que a Administración galega "cumprirá a lei" respecto á repartición de menores migrantes, pero esixiu planificación e financiamento para poder facelo. Así o defendeu este luns na rolda de prensa posterior á celebración do Consello da Xunta, onde ratificou ademais que o Goberno galego notificou ao central este domingo o número de menores co que conta o sistema de protección de Galicia, tal e como solicitara o Executivo -- que dera de prazo ata que acabase o mes de marzo --.

Sobre isto, lembrou que o sistema sofre neste momento unha sobreocupación do 108%. "Por tanto, se houbese unha ampliación, e moito máis a ampliación que se nos anuncia, antes de poder levala a cabo, loxicamente habería que ver o que imos facer con eses menores", matizou. Nesta liña, insistiu en que non se trata "simplemente" de "sacalos de encima dunha comunidade onde hai saturación", recoñece, "para mandalos a outra". "É simplemente repartir o problema sen solucionalo", critica.

A día de hoxe, apuntou, son 273 os menores non acompañados dos 900 que están o sistema. "Acollémolos e estamos a darlle o tratamento que merecen e ao que teñen dereito. Se se pretende, e desde logo nós pretendemos, seguir facéndoo, é necesario financiamento, planificación e, se mo permiten, sentidiño, para poder atendelos adecuadamente", remarcou.

"Dixemos sempre que a cota que se nos asignase iámolo a aceptar, fronte a algúns posicionamentos doutros partidos que dicían que en ningún caso. Pero o que reclamo é que as cousas se fagan de forma planificada, como se fixeron en anteriores ocasións", insistiu.

RECORRER A NORMA, "EN ESTUDO"

Alfonso Rueda puxo o foco no financiamento, explicando que, vistos os custos actuais, necesitaríanse máis de 30 millóns de euros para atender aos 326 que calculan que terían que acoller en base ao novo acordo, "sen contar gastos educativos e sanitarios", cando o anunciado son 100 millóns de euros para toda España, apuntou.

Con todo, ese "nin sequera sería o problema principal", sinalou en referencia á propia organización do sistema, que en Galicia funciona con pequenos centros. De aí a insistencia na planificación "Supoño que o Goberno todo isto terao en conta se quere facer as cousas ben, máis aló de cumprir co señor Puigdemont e sacarse un problema de encima", deslizou.

Por outra banda, e preguntado pola posibilidade de recorrer legalmente a norma, Rueda comentou que esa opción continúa "en estudo". "Non podo anunciar que o vaiamos a facer. Estamos ao estudar e cando haxa unha decisión, anunciarémola", asegurou.

O titular do Executivo galego, Alfonso Rueda, acompañado polo conselleiro de Emprego, José González, na rolda de prensa posterior á a reunión do Consello da Xunta. DAVID CABEZÓN @ XUNTA | Fonte: Europa Press