O Parlamento entregará as súas medallas á Real Academia Galega de Belas Artes, Afundación e Ramón Villares

A Real Academia Galega de Belas Artes, Afundación-Obra Social Abanca e o catedrático de Historia Contemporánea Ramón Villares serán distinguidos este sábado 5 de abril coa Medalla do Parlamento de Galicia 2025.

Tras a decisión da Mesa do Parlamento tomada a inicios de marzo, o recoñecemento entregarase como posta en valor de "a súa colaboración no ámbito da conservación e divulgación do patrimonio artístico e cultural que acolle a Cámara galega".

A data da cerimonia adiántase un día ao tradicional 6 de abril, aniversario da promulgación do Estatuto de Autonomía, ao caer este en domingo.

COLABORACIÓN DOS PREMIADOS COA CÁMARA

A Real Academia Galega de Belas Artes traballa desde 2018 de forma permanente na difusión, estudo, investigación e conservación da colección artística da Cámara.

Afundación-Obra Social Abanca comparte co Parlamento "un interese común pola difusión da arte e a cultura galegas", defenden desde a institución nun comunicado. Colaboran na difusión das súas respectivas coleccións de arte a través de exposición, intercambio de pezas ou realización de estudos.

Ramón Villares é catedrático de Historia Contemporánea da Universidade de Santiago de Compostela (USC) e foi presidente do Consello da Cultura Galega. Traballou co Parlamento como comisario da exposición 'O poder da palabra', en comeración do 40 aniversario deste órgano, e outras publicacións.

ANTERIORES EDICIÓNS

O deste ano será o primeiro recoñecemento desde 2023, xa que no ano 2024 o galardón non foi concedido pola coincidencia coas datas do comezo da XII Lexislatura.

A última distinción, entregada hai dous anos, recoñeceu a cooperación transfronteiriza entre Galicia e a Rexión Norte de Portugal.

En anteriores edicións a condecoración entregouse aos expresidentes do Parlamento e a institucións como Cáritas diocesanas, Valedor do Pobo ou Consello da Cultura Galega.

Pleno do Parlamento. PARLAMENTO