Animalistas expoñen á Xunta que invista en carnes vexetais para que Galicia sexa "potencia internacional"
Antitaurinos suxiren ao Goberno galego que pida a CRTVE a posibilidade de "desconectar territorialmente" as emisións de corridas.
Por Europa Press / Redacción | Santiago de Compostela | 26/07/2020 | Actualizada ás 11:38
A asociación animalista Libera expón á Xunta que "non quede atrás" na creación de industria relacionada coas carnes vexetais e invista nela para converter Galicia en "potencia internacional", posto que "tería moito que dicir" no sector.
Este colectivo pon como exemplo a Canadá, que deseñou un "ambicioso plan" iniciado en 2019 e que enfoca as súas guías de alimentación cara a "un maior consumo de alimentos vexetais"; e a Finlandia, que nos últimos días anunciou o seu proxecto 'EXPRO', que comeza con dous millóns de euros para favorecer cultivos e marcas de alimentos de orixe vexetal.
Así, Libera apunta o "alto rendemento económico" de Galicia en sectores como a extracción e transformación de algas, os cultivos experimentais de froitos e a "calidade" en produtos vexetais que dispoñen de denominacións de orixe. Por iso, a asociación animalista considera que "a base é forte" para iniciar un proxecto similar.
Neste sentido, os animalistas suxiren o uso de fondos do Instituto Galego de Promoción Económica (Igape) da Xunta para deseñar "un plan de apoio" a empresas galegas baseadas na nutrición con plantas.
Segundo aseguran, este sector "experimenta crecementos exponenciais de vendas cada ano" e a aposta de Galicia por el pode ser "unha alternativa real á continuidade de granxas lácteas con cada vez menos ingresos e cuxos responsables sobreviven grazas aos subsidios europeos".
UNHA TVE SEN TOUROS
Por outra banda, unha campaña de Galicia, Mellor Sen Touradas na plataforma 'Change.org' recolleu máis de 131.000 firmas para solicitar a retirada de "calquera contido taurino" das grellas audiovisuais da Corporación de Radio e Televisión Española (CRTVE).
Para apoiar esta postura, o colectivo lembra que diferentes estudos nas dúas últimas décadas "relacionan a emisión de corridas de touros na televisión con maiores niveis de agresividade en persoas menores de idade". Así mesmo, a retirada destes contidos suporían "cumprir coas recomendacións" do Comité dos Dereitos do Neno de Nacións Unidas.
Por iso, ademais de instar o Goberno central a "revisar" o manual de estilo da Corporación pública, piden á Xunta que soliciten "un criterio de elaboración da grella audiovisual diferente" para permitir "desconectar territorialmente" estes contidos "e substituílos por emisións de carácter educativo".
