O detido pola morte do seu sobriño en Santiago permanece "internado" nun hospital a disposición xudicial

O home detido pola morte do seu sobriño de tres anos na noite do luns en Santiago de Compostela segue "internado" nun centro sanitario da capital galega a disposición xudicial.

Así o aseguraron a Europa Press fontes próximas á investigación, que explicaron que a primeira parte das dilixencias realizadas por Policía Xudicial da Policía Nacional finalizaron e están á espera do que determine a autoridade xudicial.

O arrestado permanece ingresado na Unidade de Psiquiatría do Hospital de Conxo do Complexo Hospitalario Universitario de Santiago, onde foi trasladado tras a súa detención na noite do luns.

A Policía está agora á espera do que determine o Xulgado de Instrución correspondente de Santiago, a cuxa disposición está o atestado e o detido en relación coa morte deste menor de tres anos. Fontes consultadas por Europa Press apuntaron que non lle constan antecedentes ao detido en relación á morte do seu sobriño, pero sinalaron que está a tratamento psiquiátrico.

INVESTIGACIÓN

Pola súa banda, o delegado do Goberno en Galicia, Javier Losada, instou á "prudencia na información" en relación o caso do home detido pola morte do seu sobriño en Santiago de Compostela. "Quen vai determinar o que pasou é ese atestado e estase completando", asegurou, a preguntas dos xornalistas, durante un acto co secretario xeral de Infraestruturas, Sergio Vázquez.

Do detido, ratificou que se atopa internado no hospital á espera de que se lle poida tomar declaración. "E a Policía científica e xudicial facendo todos os estudos pertinentes para trasladarllo á xuíza", dixo.