Ferido grave tras caerlle unha árbore mentres camiñaba

Un home resultou ferido este xoves en Viana do Bolo tras caerlle encima unha árbore. O home, segundo informou o 112 Galicia, atopábase nunha pista de monte na parroquia de Hedroso, no municipio ourensán. O servizo tivo constancia do accidente ás 10:50 horas, a través dunha chamada do persoal do Servizo de Urxencias Sanitarias de Galicia-061.

Segundo indicaron, a vítima non se atopaba atrapada, pero requiría asistencia sanitaria urxente debido á gravidade das lesións. Por iso, nun primeiro momento, optouse por mobilizar o helicóptero medicalizado para o seu traslado.

Desde a sala de operacións do 112 Galicia activouse un operativo no que participaron o GES da Veiga, axentes da Garda Civil e da Policía Local, así como efectivos de Protección Civil da localidade. Finalmente, debido ás condicións meteorolóxicas adversas, non foi posible realizar o traslado aéreo, polo que o ferido foi evacuado por estrada en ambulancia, cunha posible lesión medular.

Ambulancia acude a unha urxencia de noite | Fonte: VaM - Arquivo