A familia do detido pola morte do seu sobriño farase cargo da súa defensa
O seu avogado fala dunha posible "inimputabilidade" se se confirma que foi un brote psicótico.
Por Europa Press / Redacción | SANTIAGO DE COMPOSTELA | 24/09/2020 | Actualizada ás 12:49
A familia do home detido na noite do luns pola morte do seu sobriño de tres anos en Santiago de Compostela, quen permanece en internamento non voluntario na Unidade de Psiquiatría do CHUS, encargou a súa defensa ao avogado Evaristo Nogueira, quen, a priori, apunta á súa posible "inimputabilidade".
"Con moita cautela, pode haber unha inimputabilidade", estimou polas hipóteses que transcenderon, en declaracións a Europa Press, tras explicar que non tivo acceso á causa porque está "en fase" de personarse como defensa, xa que lla encargou a familia porque o sospeitoso dos feitos atópase hospitalizado desde a morte do menor.
Por iso, Nogueira manifestou que aínda "pode tardar uns días" en "exercer a defensa" porque non se completou a personación no proceso debido a situación clínica do sospeitoso. "Todo o mundo ten dereito a defensa", sentenciou.
Nogueira empraza ao momento de ter acceso á causa para ter unha "opinión formada", pero apuntou que, "sen ter coñecemento do procedemento, con toda a cautela" neste caso "pode haber unha inimputabilidade" no caso de que se constate que os feitos foron cometidos no marco dun brote psicótico. O detido estaba a tratamento psiquiátrico.
"INTERNAMENTO NON VOLUNTARIO"
O sospeitoso da morte do seu sobriño na noite do luns atópase, confirmaron fontes xudiciais, en "internamento non voluntario" na Unidade de Psiquiatría do Complexo Hospitalario Universitario de Santiago.
Por iso, o Xulgado de Instrución número 1 de Santiago, que se encarga desta causa, iniciará os trámites para tomarlle declaración cando o hospital comunique a súa alta.
