Piden máis de 100 anos de cárcere para un home por inducir a menores a gravar pornografía e compartila en Internet
As forzas da orde descubriron que o acusado almacenaba no computador da súa residencia de Padrón máis de 850 horas de material pedófilo.
Por E.P. | SANTIAGO DE COMPOSTELA | 26/09/2020 | Actualizada ás 18:48
Este luns arrinca nos xulgados de Santiago o xuízo contra un home acusado de compartir material pedófilo en Internet, parte do cal obtiña a través de interaccións con menores de idade aos que inducía a gravarse en actitudes sexuais, chegando mesmo a ameazalos con revelar aos seus pais as súas interaccións na rede se non accedían ás súas peticións.
Fiscalía solicita 108 anos de cárcere por varios delitos, algúns deles continuados, de utilización de menores ou discapaces con fins pornográficos. O xuízo será a porta pechada e prorrogarase ao longo de toda a semana na sección sexta da Audiencia Provincial da Coruña, con sede na capital galega.
Os feitos, segundo recolle o escrito de acusación do Ministerio Público, producíronse entre xaneiro do ano 2013 e abril de 2016. No operativo policial, as forzas da orde descubriron que o acusado almacenaba no computador da súa residencia de Padrón máis de 850 horas de material pedófilo.
Segundo Fiscalía, o procesado compartiu máis de 3.500 arquivos pornográficos que implicaban a menores a través de aplicacións de redes 'P2P'.
Ademais de albergar e compartir pornografía pedófila, tamén se lle acusa de elaborar este material inducindo a estas prácticas a menores de 16 anos cos que contactaba por redes sociais, algunhas veces, facéndose pasar por xente da súa idade e chegando mesmo a ameazalos con revelar aos seus pais o que facían se non accedían ao que lles propuña.
A maioría da vintena de vítimas destes feitos --nacidas entre o ano 1996 e o 2003-- presentan consecuencias psicolóxicas derivadas de participar nestas prácticas, tales como inestabilidade emocional ou cadros depresivos e de ansiedade.
Así as cousas, o Ministerio Público solicita unha pena de 108 anos de cárcere, ademais dunha indemnización de 6.000 euros para cada unha das vítimas e a apertura dunha peza separada para dilucidar a súa responsabilidade civil.
