O Constitucional valora encaixar na liberdade de expresión unha chamada a prender lume á "puta bandeira"
Estuda o caso dun sindicalista que foi multado por un delito de ultraxe durante uns incidentes ocorridos en 2014 fronte ao Arsenal Militar de Ferrol.
Por Europa Press / Redacción | Madrid | 22/10/2020 | Actualizada ás 19:27
O Pleno do Tribunal Constitucional discute na súa sesión desta semana o relatorio do maxistrado Andrés Oleiro favorable a conceder o amparo a un sindicalista que foi multado por un delito de ultraxe durante uns incidentes ocorridos en 2014 fronte ao Arsenal Militar de Ferrol.
Neles, o delegado da Confederación Intersindical Galega (CIG) Pablo F. falou de prender lume á "puta bandeira" durante unha protesta laboral.
Fontes do tribunal de garantías sinalaron que a discusión deste asunto está a ser intensa, e que é bastante probable que de aprobarse o relatorio esta deixe a un tribunal moi dividido.
O sindicalista foi condenado a unha multa en marzo de 2017 polo Xulgado 1 de Ferrol como autor dun delito de ultraxes a España, unha condena que foi despois confirmada pola Audiencia Provincial da Coruña.
No seu recurso ante o TC, a defensa de Pablo F. solicita que se declare que a condena vulnera o dereito á liberdade de expresión do sindicalista, o que levaría á nulidade das decisións xudiciais. Esta tese é acollida polo relator, pertencente ao sector conservador do órgano xudicial, e agora está a ser sometida a discusión no Pleno.
