O festival Cineuropa volve a Santiago con case un cento de películas
Longametraxes como a xeorxiana 'Beginning' protagonizan a súa 34ª edición, que galardoará a Margarita Ledo, Alfonso Zarauza e Javier Gutiérrez.
Por Europa Press / Redacción | Santiago de Compostela | 03/11/2020 | Actualizada ás 14:36
O festival Cineuropa volverá a Santiago a partir deste venres cun total de 95 longametraxes, tanto películas como documentais. Será unha 34ª edición marcada pola pandemia da COVID-19, que obrigará a que os catro espazos que acollerán as proxeccións --Salón Teatro, Auditorio de Galicia, Teatro Principal e Sala Numax-- restrinxan a capacidade máxima a 30 persoas e deban efectuar labores de limpeza entre sesión e sesión.
"O consumo de cinema en salas está empíricamente demostrado que é cultura segura", garantiu o director do evento, José Luís Losa, durante a rolda de prensa de presentación deste martes, na que tamén participaron o alcalde compostelán, Xosé Sánchez Bugallo, e a concelleira de Acción Cultural, Mercedes Rosón.
Con esta premisa arrincará o venres o 34º 'Cineuropa', que manterá a súa programación ata o domingo 22 novembro cun cartel no que estarán representadas ata 38 nacionalidades diferentes, aínda que o 11 por cento serán traballos galegos. Esta edición manterá as proxeccións de prestixio internacional, con filmes premiados nos festivais de Berlín, Róterdam, Venecia, San Sebastian ou Sitges.
Entre eles, destacan a xeorxiana 'Beginning', plurigalardonada en San Sebastián; a rusa 'DAU. Natasha'; a mexicana 'Nuevo Orden'; e a danesa 'Druk (Another Round)', que será a encargada de abrir esta 34ª edición a partir das 19,30 horas no Teatro Principal. Tamén haberá espazo para estreas absolutas en España, como o documental brasileiro 'Narciso em férias', sobre a detención do músico Caetano Veloso en 1968, durante a ditadura militar.
O case cento de longametraxes estará organizado en 12 seccións. Ademais das xa habituais 'Sección Oficial Europea', 'Panorama Internacional', 'LatidoAmericano', 'Docs Cineuropa', 'Fantastique Compostela', 'Panorama Audiovisual Galego', 'Dereitos Humanos' e 'Cineuropa Miúda', haberá outras como 'Morricone, ese descoñecido' --en homenaxe ao recien falecido compositor Ennio Morricone--, 'A última película. O Cinema non cinema', 'Cinefilias. Exploración do cinema clásico' e 'Novos Realizadores'.
Así mesmo, os galardóns que se outorgarán este ano terán o cinema galego no seu epicentro, posto que se recoñecerá á cineasta e escritora Margarita Ledo, ao director e guionista Alfonso Zarauza e ao actor Javier Gutiérrez.
De forma paralela, 49 películas de cinco continentes competirán polo premio do público, que outorgan os espectadores coas súas votacións, entre elas a xeorxiana 'Beginning', a iraniana 'There is non evil' --Oso de Ouro do Festival de Berlín-- e a mexicana 'Nuevo Orden' --premio do xurado en Venecia--.
ENTRADAS A CATRO EUROS OU GRATUÍTAS
As entradas manteranse este ano a un prezo de catro euros para as seccións 'Oficial Europea', 'Panorama Internacional', 'Docs Cineuropa', 'Fantastique Compostela', 'LatidoAmericano', 'Novos Realizadores', 'Dereitos Humanos' e 'Cineuropa Miúda', mentres que o resto serán gratuítas, baixo reserva previa.
Estas poderán adquirirse na web compostelacultura.gal e no despacho de billetes do Teatro Principal, pero a organización apela a utilizar o modo telemático para evitar aglomeracións de persoas. Para as sesións desta fin de semana, as entradas estarán dispoñibles a partir deste mércores ás 10,00 da mañá.
O obxectivo deste ano é que o coronavirus "non contamine a cultura", sobre todo tras a experiencia de grandes eventos de cinema celebrados desde o mes de setembro, por exemplo o Festival Internacional de San Sebastián. "Comprobouse que, cumprindo todas as medidas, non houbo ningún gromo en ningún dos grandes festivais", engadiu José Luís Losa, quen volve como director desta cita tras un ano de ausencia.
