A ciencia non é só cousa de homes

O congreso internacional WISE, Women In Science-Ecology, botou a andar este mércores para xerar un espazo de diálogo no que detectar medidas e accións urxentes a implantar nas diferentes sociedades ecolóxicas para “reverter a situación actual” debido aos “datos alarmantes" nos que se constata o patrón de perda de mulleres a medida que se ascende na carreira profesional porque "as medidas para acabar con esta diferenza estrutural inxusta son claramente ineficientes e/ou inexistentes”, explica a profesora da USC, Mar Sobral, unha das organizadoras do congreso.

O congreso desenvolverase en liña ata o vindeiro 6 de novembro e contará cos relatorios de 24 mulleres, relacionadas co mundo académico, coa intención de analizar, dende a súa experiencia, as diversas causas que deteñen ou dificultan as carreiras das mulleres en Ecoloxía, como a invisibilidade, a desigualdade nos coidados e a conciliación familiar ou o acoso. 

III SEMANA DA CIENCIA

Pola súa parte, a III Semana da Ciencia do Instituto Galego de Física de Altas Enerxías (IGFAE) da USC estará encabezado polo relatorio A que soa o Universo? da experta en ondas gravitacionais, Gabriela González, seguido dun programa de actividades en liña nas que as mulleres serán as protagonistas.

Ademais, o 11 de novembro celebrarase o debate Física: unha ciencia sen xénero?, no que se exporá a falta de presenza feminina nos estudos do grao de Física, nos que as alumnas representan en torno ao 30%. Neste debate participarán Ana Jesús López, presidenta de AMIT- Gal e vicepresidenta do Grupo de Mulleres en Física da Real Sociedade Española de Física; Yolanda Lozano de Gender in High Energy Theory - CERN e Beatriz G. Plana do IGFAE; tres expertas en igualdade de xénero que exporán algúns datos e iniciativas que se están a desenvolver para reverter esta situación.