Pachi Vázquez acóllese ao seu dereito a non declarar durante o xuízo por presuntas irregularidades en contratacións
Os demais comparecentes tamén se acolleron ao seu dereito a non declarar "por recomendación" do seu avogado, segundo trasladou cada un deles.
Por Europa Press / Redacción | Ourense | 09/12/2020 | Actualizada ás 14:15
O exlíder do PSdeG e actual concelleiro de Espazo Común no Carballiño, Pachi Vázquez, acolleuse ao seu dereito a non declarar no xuízo celebrado para responder ante irregularidades detectadas en contratacións durante os seus anos como alcalde no municipio.
Nesta novena xornada do xuízo estaba previsto o interrogatorio a catro do cinco acusados: Pachi Vázquez, Elisa Domínguez, José Antonio Barge e Carlos Montes, mentres que Alfonso Prado estaba previsto que declarase na sesión deste xoves.
Non obstante todos compareceron este mércores acolléndose ao seu dereito a non declarar "por recomendación" do seu avogado, segundo trasladou cada un deles.
Aínda que no interior da sala non se fixeron declaracións, á saída Pachi Vázquez atendeu aos medios de comunicación. "Acollinme ao dereito a non declarar por recomendación do meu avogado así que, agora, acóllome ao dereito de facer declaracións cando saia esta sentenza".
Vázquez considerou que o proceso "se acabou" e que todos o teñen "bastante claro", pero que "o momento de falar será cando fale a xustiza", argumentando que xa declarou ata "tres veces".
"NON HAI IRREGULARIDADE"
Previamente á declaración dos investigados compareceu a última testemuña da defensa, avogado e catedrático en dereito administrativo, que rexeitou a existencia de irregularidades. "Na miña modesta opinión non hai irregularidade na contratación de indefinidos de oficio".
Para explicalo indicou que "hai unha diferenza entre indefinido e traballador fixo", posto que a pesar de ser "o mesmo no ámbito privado", no público "son privativos da administración".
"O indefinido non fixo non deixa de ser un temporal, polo que non hai, na miña modesta opinión, irregularidade no recoñecemento por parte do Concello da situación de indefinido de oficio".
Ademais, aseverou que a Inspección de Traballo en Pontevedra e en Lugo promoveu a declaración de indefinido de oficio "en moitos concellos porque eran sancionables os alcaldes se non se realizaba".
MANTENSE A ACUSACIÓN
O Ministerio Público mantén a acusación e reclama penas de inhabilitación especial para emprego ou cargo público durante dez anos para Pachi Vázquez, Carlos Montes e Alfonso Prado; nove para Jose Antonio Barge Gil, edil de persoal entre 2007 e 2011; e oito anos e nove meses para Elisa Domínguez, quen foi responsable da área social e alcaldesa en funcións durante mes e medio.
Segundo Fiscalía, nos seus respectivos períodos de mandato subscribiron "un gran número de contratacións de persoal laboral de duración determinada con respecto a 60 traballadores", e a gran maioría pasou a formar parte da nómina de indefinidos do Concello de Carballiño.
Por iso acusa de "non respectarse a normativa de acceso á Administración Pública para garantir os principios de igualdade, mérito e capacidade"
Na sesión deste xoves procederase á presentación dos informes finais, unha xornada antes do previsto inicialmente.
