Unidas Podemos alerta do paso por Galicia dun buque con problemas de "contaminación radioactiva"

O Grupo Parlamentario Confederal Unidas Podemos-En Comú Podem - Galicia En Común pide ao Goberno información relativa ao buque ruso Sevmorput, que se atopa avariado preto das costas de Canarias, a unhas 70 millas ao sur de Gran Canaria, e reclama que se adopten "medidas de prevención" para establecer garantías na súa ruta e ao seu paso polas costas galegas.

Na iniciativa rexistrada polo deputado ecoloxista de Unidas Podemos, Juantxo López de Uralde, e o deputado por Tenerife, Alberto Rodríguez, fanse eco das informacións xornalísticas acerca de que o buque ruso Sevmorput, un mercante de propulsión nuclear, pasou a unhas 25 millas (26 quilómetros) das Illas Canarias, en concreto da costa de Fuerteventura. Diversas fontes indican que o buque, ademais, "podería ter algún tipo de problema mecánico".

Ademais, sinalan que "ao tratarse dun buque de propulsión nuclear, esta situación xera unha maior preocupación, xa que aos problemas de seguridade do buque, hai que engadir o risco de posibles problemas de contaminación radioactiva, caso de que se producise algunha fuga ou escape". Por iso, López de Uralde e Rodríguez queren coñecer "cal é o problema que provocou o estraño rumbo do buque Sevmorput" e "se hai constancia dalgún problema no reactor nuclear do buque".

Desde o Grupo Confederal manifestaron a súa preocupación porque o buque Sevmorput leva a bordo un reactor nuclear da familia KLT-40 cunha potencia de 135 MW. Trátase dun reactor de fisión nuclear alimentado con uranio 235.

"BUQUE VELLO E PERIGOSO"

"O Sevmorput é un buque vello e perigoso. É moi preocupante que siga navegando cun reactor nuclear a bordo polo risco que supón para o medio ambiente mariño. O reactor leva 150 quilos de uranio enriquecido, que supoñen un risco gravísimo", sinalou López de Uralde.

Neste escenario, o deputado pola Coruña e portavoz de Galicia en Común, Antón Gómez Reino, pediulle ao Goberno que se poña "en contacto coas autoridades competentes en materia de navegación, internacionais" e as correspondentes á bandeira do buque, para que "se inhiban de aproximarse á costa galega evitando, así calquera risco que se puidese derivar do seu achegamento".

Buque sevmorput, que funciona con combustible nuclear e podería ter problemas de contaminación radioactiva | Fonte: Wikipedia