Subirán os contaxios tralo Nadal?... A resposta podería estar nas augas residuais
A USC desenvolverá un proxecto para analizar a incidencia do virus en Compostela a través das augas dunha depuradora.
Por E.P. | SANTIAGO DE COMPOSTELA | 28/12/2020 | Actualizada ás 17:29
A Xunta e a Universidade de Santiago (USC) desenvolverán un proxecto conxunto para o seguimento e detección precoz da presenza de covid-19 nas augas residuais de Santiago de Compostela. A administración autonómica, a través da Consellería de Infraestruturas e da Consellería de Sanidade, asinará un convenio de colaboración coa USC e coa concesionaria do servizo municipal da auga de Santiago, Viaqua, para facer este seguimento.
En concreto, controlarase a presenza de covid-19 nas augas de entrada da EDAR da Silvouta, de titularidade municipal, tres veces por semana, durante o primeiro cuadrimestre do ano 2021, o que permitirá avaliar a incidencia e a evolución do virus e establecer tendencias. A toma de mostras iniciarase a próxima semana e permitirá seguir a evolución dos contaxios na cidade tras as festas do Nadal, analizándose a repercusión do retorno dos estudantes e tamén o inicio da campaña de vacinación.
Ademais do seguimento da auga de entrada á depuradora, no marco do convenio tamén se tomarán mostras das augas residuais en colectores, tentando sectorializar distintas áreas da cidade, analizando tamén a presenza de material xenético do virus en diferentes etapas da estación depuradora de augas residuais, tanto na liña de auga como en residuos.
