O labirinto legal para participar nas eleccións dende o estranxeiro podería ter os días contados
O Goberno anuncia que traballa para eliminar o voto rogado, un requerimento que, dende 2011, foi acompañado dunha caída da participación do electorado emigrante nos comicios estatais e autonómicos.
Por E.P. | SANTIAGO DE COMPOSTELA | 21/02/2021 | Actualizada ás 12:04
O Pleno do Congreso ten previsto iniciar este martes a tramitación da reforma impulsada polo PSOE e Unidas Podemos para derrogar o voto rogado que desde 2011 se lles esixe aos votantes residentes no estranxeiro e que supuxo un esborralle na participación dos emigrados nas eleccións xerais e autonómicas.
Trátase dunha reforma pendente desde anos e que foi un dos asuntos que o presidente Pedro Sánchez abordou co líder do PP, Pablo Casado, na súa conversación telefónica desta semana. A toma en consideración está garantida, pero a negociación darase nos detalles do articulado. Os dous grupos que apoian ao Goberno rexistraron a súa proposición de lei o pasado 4 de febreiro e o Executivo deu o plácet á súa tramitación a través dun escrito datado apenas unha semana despois, é dicir, sen esgotar o prazo dun mes que ten para pronunciarse sobre as iniciativas lexislativas dos grupos.
Na súa iniciativa, recollida por Europa Press, os socios da coalición detallan que a combinación do voto rogado e dos prazos previstos na normativa electoral traduciuse nunha "redución moi significativa" nos niveis de participación dos electores residentes no estranxeiro. No caso das eleccións xerais celebradas en 2011, 2015, 2016 e 2019, menos do 10 por cento dos electores solicitaron ou rogaron o voto.
Para corrixir esta situación, Unidas Podemos e PSOE plasmaron no acordo de goberno derrogar o voto rogado e eliminar as trabas administrativas "inaceptables" que se estableceron na lei electoral para os "compatriotas migrantes", de face a poder garantir un exercicio "moito máis digno" a este colectivo.
DESCARGAR A PAPELETA
O texto expón que a descarga telemática da papeleta permitirá adiantar os prazos de envío da documentación electoral, facilitando así a súa recepción en prazo. Tamén pauta ampliar de tres a sete días dos prazos para o depósito do voto en urna e mantén a posibilidade de enviar o voto por correo postal á Oficina Consular correspondente no caso de que o elector non poida acudir a votar na dependencia habilitada.
Ademais, amplíase o prazo para a apertura dos votos emitidos desde o estranxeiro de tres a cinco días, atrasando no mesmo intervalo o prazo do escrutinio xeral, algo "imprescindible" se se quere que "o esforzo de participación democrática dos concidadáns no estranxeiro sexa tomado en consideración".
