Os contaxios nos colexios galegos seguen á baixa e quedan nos 1.312 casos

A incidencia da covid-19 nos centros educativos galegos segue en descenso continuado. O número de casos activos totais sitúase este mércores en 1.312 positivos, o que supón unha redución de máis dun centenar respecto ao balance facilitado pola Xunta o martes.

A baixada tamén se reflicte no descenso de aulas pechadas ata 40 (20 menos que a xornada anterior), ademais dunha escola clausurada. En concreto, trátase do centro infantil Globos de Pontevedra.

Todas as áreas sanitarias computan unha diminución de casos este mércores. A Coruña continúa liderando os casos, con 443 (16 menos) e nove aulas pechadas (unha menos). Os centros con máis positivos son o privado Plurilingüe Fogar de Santa Margarida (18 positivos), na cidade herculina, e o CEIP Eduardo Pondal de Ponteceso (13). Despois veñen os centros coruñeses CPR Plurilingüe Liceo La Paz e CPR Plurilingüe Padres Franciscanos, ambos cunha ducia cada un.

A área de Vigo, pola súa banda, suma 227 positivos (26 menos) e nove aulas clausuradas (unha menos), onde destaca o centro plurilingüe O Pilar con 25 positivos e catro unidades afectadas.

Así mesmo, na área de Lugo rexístranse 173 positivos (19 menos), seis unidades clausuradas (tres menos), entre os que destaca especialmente o CEIP Paradai con 42 contaxios (un máis) e catro unidades pechadas (tres menos), o foco de maior incidencia de toda Galicia. Outros casos reseñables son o CEIP Plurilingüe Lagostelle e o IES Poeta Díaz Castro, ambos de Guitiriz e con 19 positivos cada un.

Os centros da área de Pontevedra sitúanse en 172 positivos (12 menos) e oito unidades (12 menos) e un centro pechados. Aquí destacan o CPR Os Salgueiros (12) e o CEIP A Carballeira (10), ambos na cidade do Lérez.

En Santiago, hai 146 casos (catro menos) con tres unidades afectadas (dúas menos). Entre eles, sobresae a situación no colexio La Salle, con 20 positivos (un máis). Ferrol rexistra 94 positivos (cinco menos) e unha aula pechada (unha menos). O caso máis destacado é o centro privado Santiago Apóstolo de Narón, con 24 de contaxios. Finalmente, hai 57 contaxios en Ourense (20 menos) e mantense con catro aulas pechadas. Ningún centro nesta área sanitaria ten máis de tres casos.

Unha persoa desinfecta o perímetro que rodea o colexio público CEIP Paradai, en Lugo, Galicia (España), a 19 de febreiro de 2021. Sanidade de Lugo confirmou onte que ascenden a 60 os positivos dun brote vinculado ao colexio Paradai de Lugo, entre esco. Carlos Castro - Europa Press | Fonte: Europa Press