Miñones tomará posesión como delegado do Goberno o mércores entre as críticas do PPdeG

O Boletín Oficial do Estado (BOE) recolle este mércores, día 31 de marzo, o nomeamento do exalcalde de Ames (A Coruña) José Miñones como novo delegado do Goberno en Galicia, así como o cesamento de Javier Losada, que ocupaba o cargo desde xuño de 2018. En concreto, a designación de Miñones foi aprobada o martes polo Consello de Ministros e anunciada pola ministra de Facenda e portavoz do Goberno, María Jesús Montero, tras a reunión do Executivo.

Aínda que Miñones forma parte da dirección do PSdeG que encabeza Gonzalo Caballero, tras as pasadas eleccións autonómicas mostrouse crítico cos resultados obtidos pola candidatura liderada polo secretario xeral. Por iso, algunhas voces do partido consideraron que a súa designación por parte da dirección nacional enmárcase nun contexto no que os socialistas galegos deben de elixir a finais de ano a súa nova dirección.

Precisamente, este mesmo mércores, o alcalde de Santiago, Xosé Sánchez Bugallo, cualificouno de "promesa de futuro" no PSdeG. Con todo, na xornada do martes, Miñones aproveitou o seu primeiro acto público tras a súa designación para comparecer xunto a Gonzalo Caballero, evento no que se garantiron lealdade e coordinación entre o partido e a Delegación do Goberno. Este mércores, a alcaldesa da Coruña, Inés Rey, quixo "desexar toda a sorte" ao novo delegado e doutra banda agradeceu, "con moito agarimo", a xestión de Javier Losada. Non quixo facer valoracións sobre se este cambio afecta o futuro do PSDG.

O "PALMEIRO DE SÁNCHEZ"

O secretario xeral do PPdeG, Miguel Tellado,pola súa banda, ironizou co "xogo de tronos" e manobras "partidistas" do PSOE cos seus nomeamentos nas Delegacións do Goberno que, no caso galego, atribúe o cesamento "fulminante" de Javier Losada a un intento de Pedro Sánchez de "mover ficha" para atallar a sucesión de Gonzalo Caballero.

En todo caso, Tellado achacou este movemento de Moncloa a un novo paso na "carreira para á sucesión" de Gonzalo Caballero á fronte do PSdeG e na "guerra interna" do partido en Galicia, ao nomear precisamente a unha das voces que se mostraron máis críticas polos resultados da candidatura socialista galega.

"Resulta curioso como Caballero vivía preocupado mirando polo espello retrovisor os movementos do seu antecesor Besteiro, pero que as manobras máis preocupantes para o seu futuro político viñan patrocinadas polo propio Pedro Sánchez desde o Goberno de España", ironizou. Neste sentido, trasladou todo o "apoio" dos 'populares' a Caballero ante esta manobra e apelou a que cambie "a súa actitude" e empezo a defender os intereses de Galicia.

"O señor Gonzalo Caballero tivo ocasión de ver que ser palmeiro de Sánchez non garante absolutamente nada, como lle pasou ao señor Losada. Que tente por unha vez defender os intereses dos galegos que serán moito máis agradecidos", resolveu. Tellado censurou, ademais, as "prioridades" do propio Sánchez co seu "xogo de tronos" para tentar "desestabilizar" os gobernos autonómicos e as súas "manobras partidistas" no propio PSOE, para considerar que o "cesamento fulminante" de Losada representa o "recoñecemento tácito do fracaso político" dos socialistas en Galicia.

"COORDINACIÓN ÍNTEGRA"

Pola súa banda, o secretario de Organización do PSdeG, José Antonio Quiroga, apostou pola "coordinación íntegra" do partido co novo delegado do Goberno en Galicia ao que trasladou as súas felicitacións. Ademais, chamou o partido a "deixar o ruído innecesario" en momentos de pandemia.

Nun comunicado remitido aos medios, Quiroga sinala que é o tempo da "unidade" e da "lealdade" fronte á crise á vez que incidiu en que "todo o partido debe estar envorcado nas mellores políticas para facer fronte á crise". "O secretario xeral xa trasladou a todo o partido que é o tempo de priorizar a resposta fronte á crise, porque este vai ser un ano clave para a reconstrución de Galicia", engadiu o secretario de Organización.

"Non é o momento de medias tintas nin de xogar a confundir, porque moita xente o está pasando mal", incide Quiroga, que subliña que, nestes momentos, "non tocan cuestións orgánicas". "Ninguén entendería que nos dedicásemos a falar de nós mesmos en lugar de buscar solucións aos problemas da xente nunha crise desta magnitude".