Suspendido o prazo concedido aos Franco para retirar bens do Pazo de Meirás

O Xulgado de Primeira Instancia número 1 da Coruña suspendeu o prazo dun mes concedido á familia Franco para retirar bens do Pazo de Meirás. O órgano emitiu unha resolución na que deixa en suspenso esta decisión, adoptada o pasado 28 de abril.

O tribunal adopta esta decisión á espera de que se resolvan os incidentes sobre os bens e elementos que os familiares do ditador poderían sacar o inmoble, ademais dos recursos de reposición presentados tanto polo Estado, a Xunta, a Deputación provincial e os concellos da Coruña e Sada.

Este mesmo xulgado emitiu outra resolución na que se require ao Estado a depositar, no prazo máximo dun mes, toda a documentación e información que xustifique a necesidade de realizar obras no pazo, tal e como solicitaba a familia Franco.

Neste sentido, o Goberno central deberá xustificar a declaración de emerxencia das contratacións das obras e especificar os traballos concretos realizados, aqueles que está a executar e os que "proxecta executar".

Entre a documentación deberá incluír a memoria proposta para a declaración de emerxencia de determinadas actuacións, que foi elaborada pola Delegación de Economía e Facenda da Coruña.

Tamén terá que remitir o encargo realizado á empresa no que se detallan pormenorizadamente as obras de emerxencia a realizar, tanto no edificio principal como na contorna do pazo (incluíndo o seu custo), así como un estudo sobre a situación das instalacións eléctricas do edificio e o contrato para solucionar de maneira urxente os problemas detectados. O Estado, ademais, deberá facilitar os contratos relacionados coa xardinaría.

PETICIÓN DENEGADA AOS FRANCO

Mentres, o Xulgado de Primeira Instancia número 1 da Coruña denegou á familia Franco a súa petición de que uns técnicos propostos polos demandados puidesen inspeccionar presencialmente as partes ou elementos do pazo afectados polas obras.

No auto, contra o que cabe presentar recurso de apelación, a xuíza destaca que a Administración "afirma a existencia dunha ampla reportaxe fotográfica" na que se recolle o estado previo do inmoble antes dos traballos a executar.

"Non nos atopamos ante unha empresa privada ou particular que por iniciativa propia acomete unha serie de obras que entende como necesarias, senón ante unha administración pública -Consello de Ministros- que á vista da memoria proposta para a declaración de emerxencia e do expediente administrativo correspondente autoriza as obras e actuacións a realizar".

"Estando documentadas e aprobadas, do mesmo xeito que a partida orzada para a súa realización", subliña a xuíza. Así, engade que "á vista da proba documental e dos informes periciais dos técnicos da Administración, os demandados terán acceso e pleno coñecemento das obras a realizar/realizadas e o custo fixado a cada unha delas".

Por outra banda, engade que, no caso de que fose estimado o recurso de casación contra a sentenza que outorga a propiedade do inmoble ao Estado e a familia Franco pretendese reclamar o custo dos traballos realizados polo seu carácter necesario, "a carga da proba correspondería á Administración e, por iso, é a máxima interesada en poder acreditar o estado real do inmoble antes de iniciar as obras".

Esta decisión xudicial prodúcese despois de que a sección terceira da Audiencia Provincial da Coruña revogase o depósito temporal dos bens a favor do Estado e o Xulgado de Primeira Instancia número uno, en base a esa decisión xudicial, permitise a retirada dos mesmos á familia do Franco e déselles un prazo de mes como solicitaron.

DELEGACIÓN DO GOBERNO

O delegado do Goberno en Galicia, José Miñones, celebrou este martes a nova resolución xudicial sobre o Pazo de Meirás, tras suspender o Xulgado de Primeira Instancia número 1 da Coruña o prazo dun mes dado ao Franco ata que se resolvan os recursos, e apela á "aposta do Executivo por protexer os bens do Estado".

José Miñones valorou o esforzo da Avogacía do Estado por "evitar perdas" no Pazo de Meirás. Ao fío diso, incide en que a "defensa" do inmoble como patrimonio público é "un claro valor nunha democracia madura".

Tamén remarca o feito de que o importante é "manter o patrimonio público en mans do Estado. "E o Executivo esfórzase para iso", apostila. Por outra banda, afirma que o Goberno "realizou e realiza unha serie de actuacións de carácter urxente para poder abrir o pazo canto antes".