Citados uns 4.300 mozos a cribados esta fin de semana en Culleredo e outros 2.000 na Pobra
Serán citados mediante mensaxe SMS.
Por Europa Press / Redacción | SANTIAGO DE COMPOSTELA | 21/05/2021 | Actualizada ás 16:22
O Servizo Galego de Saúde (Sergas) prosegue esta fin de semana cos cribados para detectar casos de Covid-19 en persoas asintomáticas, para o que convocou a uns 4.300 mozos de Culleredo a probas PCR. Tamén convocou a uns 2.000 de 20 a 40 anos na Pobra do Caramiñal, na área compostelá.
En concreto, a área Sanitaria da Coruña e Cee informou de que, deste xeito, "continúa realizando unha intensa actividade de procura de casos positivos de Covid-19".
Por iso, este sábado, día 22, e o domingo, día 23, terá lugar en Culleredo un cribado poboacional mediante test PCR aos veciños de entre 20 e 36 anos.
As probas levaranse a cabo no Centro de Saúde do Portádego, onde todos os veciños deste concello pertencentes á franxa de idade establecida, uns 4.300, serán citados mediante mensaxe SMS nos seus teléfonos móbiles en horario de 9,00 a 14,00 horas e de 15,00 a 21,00 horas.
Pola súa banda, a área Sanitaria de Santiago e Barbanza levará a cabo este sábado en horario de mañá e tarde un cribado no centro de saúde da Pobra mediante PCR cunhas 2.000 persoas convocadas de 20 a 40 anos, citadas a través de SMS.
Por parte do Sergas pídese que se asista ao cribado e se respecte a hora e data da cita co obxectivo de "evitar aglomeracións".
