Os galegos contratados por ETT duplicaron aos que acudiron a unha oficina pública en 2020
O 67% dos ocupados de Galicia contaba con xefes pero non tiña ningún subordinado.
Por Europa Press / Redacción | SANTIAGO DE COMPOSTELA | 25/06/2021 | Actualizada ás 13:50
Dos 869.600 asalariados residentes en Galicia o ano pasado, 32.500 persoas foron contratadas a través dunha empresa de traballo temporal e 15.800 obtiveron o seu posto actual coa mediación dunha oficina de emprego pública.
En 2020, segundo os datos da enquisa de poboación activa (EPA) que publica este venres o Instituto Galego de Estatística (IGE), o 67% dos ocupados de Galicia contaba con xefes pero non tiña ningún subordinado. A porcentaxe era maior entre mulleres (72%) que entre homes (62,7%).
A seguinte categoría en importancia era a de ocupado independente, isto é, sen xefes e sen subordinados, na que se atopaba o 12,4% dos traballadores galegos. Mentres, o 62,3% dos ocupados galegos non traballou ningún sábado o exercicio pasado, o 8,1% traballou só un sábado ao mes e o 27,5% fíxoo polo menos dous ao mes. O 78,3% non traballou ningún domingo.
No tocante ao tipo de xornada, algo máis da metade dos ocupados (59,4%) tiña xornada continuada. Entre as mulleres, esta porcentaxe subía ao 67,4%, 14 puntos por encima da masculina.
