O Goberno comprométese a colaborar cos colectivos de memoria histórica galegos
Este sábado celebrarase un acto institucional, ao que asistirá Carmen Calvo, para escenificar a recuperación do Pazo de Meirás.
Por Europa Press / Redacción | SANTIAGO DE COMPOSTELA | 25/06/2021 | Actualizada ás 18:59
O Goberno central comprometeuse a desenvolver liñas de colaboración coas entidades e asociacións vinculadas á memoria histórica de Galicia. Así o trasladou o secretario de Estado de Memoria Democrática, Fernando Martínez, que este venres mantivo un encontro con representantes das asociacións memorialísticas galegas.
A reunión prodúcese en véspera do acto de reapertura pública dos xardíns do Pazo de Meirás, onde este sábado se celebrará un acto institucional con presencial da vicepresidenta primeira, Carmen Calvo, para escenficiar a recuperación do complexo tras o proceso xudicial contra os herdeiros do ditador Francisco Franco.
Así as cousas, o responsable de Memoria Histórica do Executivo central mostrou o seu compromiso a articular liñas de cooperación coas entidades galegas que traballan pola memoria democrática.
O obxectivo, segundo traslada o Goberno nun comunicado, é que estes colectivos conten con asesoramento de persoas expertas para "analizar e elaborar propostas sobre o uso e destino do inmoble".
No encontro estiveron representados as comisións pola Recuperación da Memoria Histórica da Coruña, Ferrol, Barbanza e Marín, Fundación 10 de Marzo de CCOO, Asociación para a Dignificación das Vítimas do Franquismo, Memoria Histórica Democrática de Ferrol, Alexandre Bóveda, UGT, Fundación Luís Tilve, e a Asociación Cultural Irmáns Suárez Picallo, da CIG.
MIÑONES VISITA AMES
Por outra banda, o delegado do Goberno en Galicia, José Miñones, visitou este venres Ames, municipio que gobernou ata a súa designación como representante de Executivo central na Comunidade galega.
Alí mantivo un encontro co alcalde do municipio, Blas García, e tamén coñeceu o proxecto de humanización da estrada N-550 en O Milladoiro, que xa completou a primeira das catro fases do proceso e que supuxo o desvío do tráfico pesado.
Miñones, segundo recolle un comunicado, tamén avanzou que se traballa no estudo de ordenación da glorieta para o desvío do tráfico que procede de Santiago ata o parque de Novo Milladoiro.
Esta será a segunda fase da actuación, para a que se reserva un orzamento aproximado duns 400.000 euros. A previsión é que o estudo estea listo despois do verán para iniciar os traballos ao longo do ano 2022.
