Feijóo ficha a Comesaña para unha cúpula do PPdeG con Romay como presidente de honra

O popular Alberto Núñez Feijóo fichou ao conselleiro de Sanidade, Julio García Comesaña, que leva dous meses militando no PPdeG, para a dirección do partido --será coordinador da área sanitaria--, e tivo un xesto con quen se considera o seu 'pai político', José Manuel Romay Beccaría, quen será (do mesmo xeito que Mariano Rajoy, que xa tiña esta condición) presidente de honra do partido.

Na candidatura que presentou o xefe do Executivo autonómico e que será votada na segunda xornada do 17º Congreso do PPdeG, no que Feijóo revalidará o seu liderado por quinta vez, destaca o incremento dos perfís locais. Non en balde, Feijóo foi moi claro no seu discurso: preséntase para tratar de mellorar resultados nas próximas eleccións municipais. Evitou, con todo, calquera compromiso en relación ás autonómicas de 2024.

Ademais, decidiu incrementar de catro a seis o número de vicesecretarías da organigrama popular, en relación ao ano 2016. Non repite ningún dos catro dirixentes que foi designado vicesecretario no último conclave e entran dúas conselleiras: a de Política Social, Fabiola García (que se ocupará da Vicesecretaría ligada aos servizos públicos); e a de Medio Ambiente, que será a vicesecretaria popular de Axenda Verde.

Outro exconselleiro, agora na area local, José Manuel Rey Varela, encargarase da Vicesecretaría de Acción Municipal; mentres Raquel Touriño, presidenta da Federación pola Igualdade de Pontevedra, será a Vicesecretaria de Igualdade. Finalmente, a vicesecrtaria de Acción Sectorial será Olga Igrexas, alcaldesa de Triacastela (Lugo), e o responsable da Vicesecretaría de Acción Electoral, Gabriel Alén, delegado territorial da Xunta en Ourense.

COORDINADORES E COMITÉS

Nos seguintes niveis seguirán como coordinador do Comité Electoral o alcalde de Cervo, Alfonso Villares; e do Comité de Dereitos e Garantías, Celso Delgado, deputado nacional no Congreso.

Ademais de Comesaña, que ocupará a coordinación da área sanitaria, seguirá fiel a Feijóo como coordinadora de Comunicación, Mar Sánchez Sierra; mentres que Ávaro Pérez López será o coordinador de Estudos e Programas; a deputada estatal Marta González será a coordinadora interparlamentaria; e a deputada no Pazo do Hórreo Paula Prado, coordinadora de Participación.

Da coordinación de Acción Institucional ocuparase Diego Gago; mentres que Diana Pérez, asesora da Presidencia da Xunta, será coordinadora de Mobilización Electoral. Ao tempo, Pablo Ferradás, xefe de gabinete da Consellería de Educacion ocuparase de coordinar a área de Acción Institucional.

Eduardo Galván, responsable redes sociais do PPdeG, será o coordinador de Novas Teconologías; e Paula Mouzo, edila en Camariñas, será coordinadora de Movementos Sociais. A deputada Noelia Pérez será coordinadora de Familia, e Antonio Rodríguez Miranda, secretario xeral de Emigración, coordinador de Acción Exterior.

OUTRAS ÁREAS

O coordinador de Política Europea será Alberto Escobar, asesor no Parlamento Europeo; o de Medio Rural, Avelino Souto, concelleiro en Lalín; Antón Acevedo levará a área de Innovación sociosanitaria; e Jovana Oroza será a coordinadora de Mar.

O coordinador de Economía e Industria será Pablo Casal, secrrtario xeral técnico da Vicepresidencia segunda; o de Emprego, Pablo Fernández, concelleiro do PP de Pontevedra; o de Educación, o deputado Ovidio Rodeiro; a coordinadora de Crecemento Sstentable, Sagrario Pérez Casteláns, directora xeral de Calidade Ambiental; e a de Cultura, Teresa Egerique.

Como coordinador de Territorio e Infraestruturas estará Antonio Ameijide; mentres que a coordinadora de Concellos Rurais será Patricia Lamela e o de Deportes, Daniel Benavides.

VOGAIS: VOCACIÓN MUNICIPALISTA E OUTROS CARGOS

A vocación municipalista que pretendeu imprimir Feijóo vese na proposta global da xunta directiva, o órgano máis amplo que rexe o partido, e que incorpora a numerosos alcaldes e tamén cargos ou asesores na Xunta.

O mesmo ocorre nos vogais electivos, entre os que se atopan destacados dirixentes locais e, entre outros, Juan Manuel Jiménez Morán, o que fose alcalde de Verín e rival de Manuel Baltar (co apoio -nunca recoñecido abertamente- da entón cúpula galega), ou Eloína Núñez, familiar do candidato e xerente da área sanitaria compostelá.

"REFERENCIA DO PP CÁNTABRO"

A presidenta do Partido Popular de Cantabria, María José Sáenz de Buruaga, definiu este venres ao seu homólogo galego e presidente desa comunidade, Alberto Núñez Feijóo, como "referencia" para o partido na comunidade autónoma e destacou a súa "capacidade para pelexar pola autonomía e a economía da súa terra fronte a un Miguel Ángel Revilla que ten moita cota de pantalla e fala moito, pero non fai nada".

Díxoo esta tarde no 17 Congreso Rexional do PP durante a súa intervención nunha mesa de presidentes autonómicos do PP, informa o partido nun comunicado.

Buruaga afirmou que "os cántabros miran con envexa a un presidente como Feijóo, que cada día dá a talla e pelexa pola autonomía e a economía da súa terra". E contrapúxolle co rexionalista, que "renunciou a exercer a autonomía e está rendido aos pés do seu socio de coalición", o PSOE.

"CON ENVEXA"

A presidenta do PP asturiano, Teresa Mallada, participou tamén no XVII Congreso do PP de Galicia, onde recoñeceu mirar aos seus compañeiros de partido en Galicia "con envexa" por facer da Comunidade "un exemplo" para o resto de España.

Durante a súa intervención, explicou que, aínda que Asturias e Galicia teñen "retos similares" como o declive demográfico, o futuro da industria ou o mantemento do sector primario, en Galicia demostrouse que hai "capacidade e talento para ter futuro".

En Asturias, dixo, o seu partido traba para que os asturianos lles dean a oportunidade de poder demostrar que a rexión tamén ten futuro. "Debémosllo aos nosos fillos", incidiu, remarcando que nas últimas dúas décadas Asturias perdeu 140.000 mozos, liderando ademais a taxa de natalidade máis baixa do país.

"Estes datos só se combaten aplicando as políticas do Partido Popular", asegurou a presidenta do PP asturiano. Iso é, na súa opinión, o que necesita España con Pablo Casado, e o que necesita Asturias, "para pór fin a décadas de políticas socialista erradas, deixar atrás á Asturias subvencionada, afogada por unha fiscalidade excesiva e cunha Administración lenta e ineficaz".

Mallada finalizou a súa intervención felicitando ao presidente do PP galego, Alberto Núñez Feijóo, polos "grandes logros" conseguidos en Galicia e ofrecendo a "todos os galegos" a lealdade e o "agarimo máis sincero" dos asturianos.

REFERENTE NA DEFENSA DA ESPAÑA DAS AUTONOMÍAS

O presidente da Comunidade, Fernando López Miras, recoñeceu que "o decano dos presidentes autonómicos do PP" é para todos un "referente" na defensa de "a España das autonomías, agora que tan cuestionada está". "Foi capaz de facer máis España a través da identidade dos galegos, facer máis forte Galicia, e que o resto dos españois sintamos, en certa maneira, identificados con esta comunidade", defendeu.

Destacou que Feijóo é "un compañeiro" no día a día, "un presidente responsable, comprometido, capaz, guiado pola moderación e pola reivindicación".

De igual forma, resaltou que conta, ademais de con o seu liderado, cun "gran partido unido, forte, que representa á sociedade de Galicia e que responde os seus intereses e aos seus problemas".