Festivais galegos reivindican o control que fan ante a covid e piden revisar uns protocolos que lles "asfixian"
O apoio da Xunta a través da marca 'Fest Galicia' é "imprescindible" para "sobrevivir" no actual contexto, din.
Por Europa Press / Redacción | SANTIAGO DE COMPOSTELA | 19/07/2021 | Actualizada ás 14:59
Responsables de festivais galegos reivindicaron que "a xente está máis controlada dentro que fóra" dos recintos e pediron a revisión duns protocolos que lles "asfixian" tanto en termos económicos como anímicos.
Así se pronunciou, en concreto, a presidenta da asociación Festivais de Galicia, Raquel Seijo, durante a presentación da nova tempada da marca 'Fest Galicia', que inclúe o patrocinio de 13 festivais baixo a lema 'Un destino musical seguro'.
En concreto, son Atlantic Fest, Caudal Fest, Festival da Luz, Maré Compostela, PortAmérica, Resurrection Fest, Revenidas, 17º Ribeira Sacra Festival, Sinsal, Sorrías Baixas, Underfest, Vive Nigrán e WOSFestival.
Consciente de que "os tempos complicados", o director da Axencia Galega das Industrias Culturais (Agadic), Jacobo Sutil, resaltou que 'Fest Galicia' "non é só cultura", senón tamén "turismo, igualdade, medio ambiente, lingua e mocidade". Ademais, aplaudiu aos responsables dos festivais como "exemplo no respecto da normativa e o coidado do público".
Por parte de Atlantic Fest, Susana Laya celebrou que se está "a reactivar xa" como sector, nun "camiño que foi super difícil".
Pola súa banda, Raquel Seijo lamentou que "se está pondo o foco nos festivais e concertos" cando "a xente está máis controlada e con máis esixencia dentro" que fóra dos recintos. "Estamos a ser prexudicados polos parámetros e a realidade vai doutra banda fóra", afirmou.
Ambas agradeceron o apoio da administración a través da marca 'Fest Galicia' e Seijo valorou tamén o comportamento "completamente exemplar" dos asistentes aos festivais xa desenvolvidos.
Mentres, o conselleiro de Cultura, Román Rodríguez, que pechou o acto antes da intervención da violonchelista viguesa Margarida Mariño, comprometeu o apoio da Xunta para "non perder" as empresas deste ámbito.
"Imos estar ao voso lado porque cremos que este é un proxecto de país, básico para a industria cultural e a marca Galicia", incidiu.
ACHEGA DA XUNTA
'Fest Galicia' refórzase este ano cun aumento da súa dotación económica nun 25% respecto de 2020 co obxectivo de contribuír á recuperación do sector.
Así, a Xunta informa de que retomou este ano a convocatoria específica de subvencións a festivais de música, suspendida en 2020 ante a imposibilidade de levar a cabo eventos nos seus formatos habituais.
Esta liña de axudas, en proceso de tramitación cara á súa "próxima adxudicación", distribuirá outros 340.000 euros entre os encontros beneficiarios, polo que o investimento total sitúase nos 840.000 euros.
