Continúa baixo control o lume iniciado o sábado en Negueira de Muñiz e declaran extinguido o de Calvos de Randín
O incendio forestal que empezou o sábado en Negueira de Muñiz queimou unhas 30 hectáreas. Mentres, o de Calvos de Randín arrasou 0,01 hectáreas de monte raso.
Por Europa Press / Redacción | SANTIAGO DE COMPOSTELA | 23/08/2021 | Actualizada ás 16:45
O incendio forestal que empezou o sábado no concello lugués de Negueira de Muñiz segue baixo control desde as 12,59 horas do domingo, tras queimar unhas 30 hectáreas. Mentres, o de Calvos de Randín, na mesma provincia, quedou extinguido pasado o mediodía deste luns e arrasou 0,01 hectáreas de monte raso dentro do parque natural da Baixa Limia-Serra do Xurés.
Segundo a información da Consellería de Medio Rural, no lume de Negueira de Muñiz, que se localiza en concreto na parroquia de San Pedro de Ernes, participaron nove axentes, 33 brigadas, nove motobombas, dúas pas, un tractor, catro helicópteros e seis avións.
En Calvos de Randín as chamas déronse por extinguidas ás 12,35 horas, na parroquia de Randín, e afectaron a 0,01 hectáreas de monte raso dentro do parque natural da Baixa Limia-Serra do Xurés. Na súa extinción participaron un axente, unha brigada e unha motobomba.
