O Concello de Campo Lameiro estuda interpor accións xudiciais contra o peche dunha sucursal
O concello presentará ante o Banco de España unha batería de denuncias por "desatención á poboación do rural".
Por Europa Press / Redacción | PONTEVEDRA | 02/09/2021 | Actualizada ás 17:22
A xunta de portavoces do Concello de Campo Lameiro, en Pontevedra, acordou facultar ao alcalde, Carlos Costa, a iniciar contactos con avogados para buscar asesoramento para interpor accións xudiciais no caso de que Abanca peche a sucursal que ten nesta localidade.
Nun comunicado remitido aos medios, o Consistorio sinala que estudará interpor as accións xudiciais pertinentes por danos e prexuízos contra os intereses e os dereitos dos veciños, que "se verán obrigados a desprazarse a varios quilómetros de distancia para poder dispor da atención e dos servizos bancarios que necesiten".
O Consistorio sinalou que, ao mesmo tempo, os veciños de Campo Lameiro empezarán este venres a presentar follas de reclamación interna ante Abanca polo "prexuízo ocasionado" polo "inminente peche da sucursal".
Segundo sinalou o Concello, esta reclamación de carácter individual farase como paso previo á presentación ante o Banco de España de toda unha batería de denuncias por "desatención á poboación do rural".
PORTA ABERTA AO DIÁLOGO
Con todo, o Consistorio sinala que mantén a "porta aberta ao diálogo" con Abanca para explorar solucións satisfactorias que permitan aos veciños seguir gozando dos servizos bancarios no seu municipio.
Segundo indicou, unha reunión prevista para o 31 de agosto foi aprazada por indisposición dunha das persoas que formaba parte da delegación que se achegaría ata o Concello para falar co alcalde.
O rexedor indicou que "quedaron en pór unha nova data" para celebrar este encontro no que os edís de Campo Lameiro "teñen depositadas moitas esperanzas en que a Dirección de Abanca sexa sensible a un problema que pode ter solución se hai colaboración e boa disposición por parte da entidade".
