A Xunta celebra o "impacto positivo" da Volta en Galicia e a "conexión" cun "ano especial"
Alfonso Rueda advertiu que é prematuro avaliar o "retorno" pero que "sen dúbida o impacto é positivo".
Por Europa Press / Redacción | VIGO | 06/09/2021 | Actualizada ás 14:42
O vicepresidente da Xunta e conselleiro de Presidencia, Xustiza e Turismo, Alfonso Rueda, celebrou este luns o "impacto positivo" do desenvolvemento en Galicia de tres etapas da Volta ciclista e a "conexión" deste evento deportivo cun "ano especial", como é o ano Xacobeo (que este ano é 'dobre', ao ter lugar no bienio 2021-2022). Así o trasladou a preguntas dos medios tras participar en Vigo no acto de presentación da Bienal Internacional de Cartelismo-Concurso Francisco Mantecón, que impulsa Terras Gauda.
Alfonso Rueda lembrou que a Volta finalizou hai apenas unhas horas, cunha última etapa a contrarreloxo con final na Praza do Obradoiro de Santiago de Compostela e, por tanto, é prematuro medir o impacto que tiveron esa e as outras dúas etapas que discorreron por terras galegas.
En todo caso, apuntou que "a xente que había no percorrido de todas as etapas" xa é "un indicativo" da "aceptación" que este evento ten en Galicia. Ademais, lembrou que A Volta ten repercusión a nivel mundial, non só pola retransmisión en directo das etapas, senón tamén grazas ás repeticións e a todo o material audiovisual que se difunde.
O responsable de Turismo da Xunta afirmou que "haberá que avaliar" ese "retorno", pero "sen dúbida o impacto é positivo". Así mesmo, valorou tamén a repercusión "a efectos de promoción" de imaxes como a do gañador da Volta, Primoz Roglic, vestido de peregrino e subido ao podio.
Por tanto, Rueda sinalou que, "como primeira valoración global", hai que estar "satisfeitos" porque A Volta estivo en Galicia, e polo seu "impacto", "significación e conexión este ano tan especial, con todo o que supón o Xacobeo para Galicia".
