O XX Festival Agustín Magán exhibirá en Santiago os espectáculos de oito compañías de teatro afeccionado
As entradas para os espectáculos serán gratuítas, previa reserva de entradas
Por E.P. | Santiago de Compostela | 14/09/2021 | Actualizada ás 13:10
O XX Festival Agustín Magán, organizado pola Federación Galega de Teatro Afeccionado , porá en escena en Santiago de Compostela os espectáculos de oito compañías de teatro afeccionado nunha edición que homenaxeará ao actor e director que dá nome ao evento.
O evento terá lugar no Teatro Principal, na Sala Magán do Centro Sociocultural de Santa Marta e no Salón Teatro. A programación foi presentada este martes nunha rolda de prensa na que participaron a presidenta de Fegatea, Chelo Pamillón; o secretario xeral de Cultura, Anxo Lorenzo; a edil de Cultura de Santiago, Mercedes Rosón; e o director do CDG, Fran Núñez.
Na comparecencia, Chelo Pampillón lembrou que Fegatea é unha das maiores federacións de teatro afeccionado de España, que conta 50 grupos das catro provincias, constituídos por 600 persoas. Ademais, detallou que todas os espectáculos serán gratuítos, previa reserva de entrada.
Así mesmo, explicou que os espectáculos terán lugar os días 17, 18 e 19 no Teatro Principal, onde se porá en escena as obras 'Lisístrata' de Teatrino; 'Carolina Ultrasónica', de paso de Valverde; e 'Dominou Celeste ou Que vai ser de ti Ernesto!', de Teatro Escoitade.
Pola súa banda, a Sala Magán do Centro Sociocultural de Santa Marta acollerá o día 24 'Confinad@s', da Tequerreté; e o día 25 'Facendo as partixas', de Axóuxere Teatro. Por último, os días 1, 2 e 3 de outubro porase en escena 'Olimpo's' de FarandOleiras Cabaret; 'A derradeira bala', de Farándula Velutina; e 'Xacovedra', de Andaravía Teatro.
Para terminar as actividades desta vixésima edición, levará a cabo o día 3 de outubro, a partir das 19,30 horas no Salón Teatro, unha homenaxe ao actor e director de teatro amador que lle dá nome ao festival, Agustín Magán.
