A débeda pública da Galicia do PP aumenta ao seu máximo histórico ao pasar dos 12.000 millóns
Rexistra 333 millóns máis de endebedamento no segundo trimestre fronte ao anterior, aínda que baixa ao 20,1% o cociente respecto ao PIB.
Por Europa Press / Redacción | Compostela | 30/09/2021 | Actualizada ás 14:48
A débeda pública de Galicia sobe a 12.071 millóns de euros no segundo trimestre de 2021, o que supón a maior cifra na serie histórica, segundo os datos que publica este xoves o Banco de España.
É a primeira vez que o endebedamento galego supera os 12.000 millóns, nun segundo trimestre do ano cun aumento de 100 millóns respecto ao mesmo período de 2020, así como 333 millóns de euros máis se se compara co primeiros tres meses de 2021.
Con todo, o cociente de débeda/PIB de Galicia sitúase no 20,1% no segundo trimestre, tres décimas menos (20,4%) respecto do primeiros tres meses. Ata a data, a marca de endebedamento público de Galicia produciuse no segundo trimestre de 2020 (con 11.971 millóns de euros). Os actuais 12.071 millóns supoñen a sétima maior cifra global entre autonomías.
Pola súa banda, a débeda das empresas públicas non incluídas no sector administracións públicas elévase en Galicia a 27 millóns de euros, a cantidade máis elevada no últimos seis anos.
A XUNTA DEFENFESE
Pola súa banda, nun comunicado, a Consellería de Facenda refírese ao endebedamento por habitante para destacar que Galicia é a terceira comunidade con menor cifra neste caso, con 4.476 euros fronte a 6.607 euros de media.
Igualmente, subliña que Galicia é a terceira comunidade de réxime común con menor endebedamento respecto ao PIB, posto que o 20,1% é 6,8 puntos inferior ao 26,9% da media de comunidades.
A Xunta defende que Galicia "é a comunidade autónoma con menor aumento de volume de débeda desde o ano 2008, exercicio no que comezou a tendencia ascendente na evolución de endebedamento no conxunto das administracións públicas".
