A Xunta dita o 100% de servizos mínimos no Sergas ante a folga en función pública deste xoves

A Xunta ditou o 100% de servizos mínimos nos servizos sanitarios ante a folga na administración pública convocada en todo o Estado por varios sindicatos e que en Galicia está apoiada pola Central Unitaria de Traballadoras (CUT) e Co.Bas, a Confederación Intersindical e STAP de Solidariedade Obreira.

Este mércores, o Diario Oficial de Galicia (DOG) recolle as dúas ordes emitidas polo Executivo galego que establecen os servizos mínimos para a xornada deste xoves, na que os funcionarios están chamados a parar en protesta pola temporalidade nas administracións públicas.

Así, os servizos mínimos alcanzarán o 100% en case todos os departamentos do Servizo Galego de Saúde. No súa xusficación, o Goberno galego incide en que a crise sanitaria segue latente a pesar da súa evolución positiva, polo que considera necesario contar cos máximos efectivos para a cobertura da totalidade da actividade.

Por tanto, decreta uns servizos mínimos do 100% nos persoais do 061, hospitalización do Sergas, enfermaría ou atención primaria. Para o persoal de xestión, establece o 100% nos sevicios de urxencias e o número de traballadores habitual para domingos ou festivos en hospitalización.

Os persoais de mantemento ou lavandaría poderán chegar á metade, mentres que en limpeza fixa a obrigatoriedade de cubrir a totalidade da quenda en todas as áreas salvo en radioloxía intervencionista, esterilización e hospitalización non covid, que poderán funcionar ao 70%. Para os traballadores administrativos sanitarios, a Xunta fixa o 40% da asistencia para a área de persoal e o 25% para subministracións, almacén e contabilidade.

Así mesmo, outra orde ditada pola Vicepresidencia Primeira e Consellería de Presidencia, Xustiza e Turismo marca os servizos mínimos para o resto de persoais da administración dependentes das consellerías.

Marcha en Santiago convocada polo comité de folga de urxencias do CHUS