O Goberno negociará coa Xunta a nova lei das herdanzas en vida tras as críticas de Núñez Feijóo
Vense de constituír unha mesa de traballo para analizar unha normativa que a Xunta ve en colisión coa Constitución.
Por E.P. | SANTIAGO DE COMPOSTELA | 03/11/2021 | Actualizada ás 13:09
Representantes da Xunta e do Goberno central fixarán xa un calendario para sentar a negociar e tratar de resolver as discrepancias manifestadas polo Executivo que dirixe Alberto Núñez Feijóo en relación á lei de medidas de prevención e loita contra a fraude fiscal, co foco na tributación polas herdanzas en vida.
O Goberno xa accedera a negociar coa Xunta e o Diario Oficial de Galicia (DOG) publica este mércores o seguinte paso, o acordo da Comisión Bilateral para iniciar as negociacións en relación ás discrepancias manifestadas polo artigo terceiro desta lei, que modifica cuestións relacionadas co IRPF, así como coa disposición transitoria primeira 4 sobre a entrada en vigor da reforma.
Tamén se acorda designar un grupo de traballo co fin de propor á Comisión Bilateral de Cooperación a solución que proceda e, de acordo ao que estipula o procedemento habitual, comunicar este acordo ao Tribunal Constitucional, ademais de publicalo no DOG e no Boletín Oficial do Estado (BOE).
A Xunta argumentou no seu día que entende que o novo réxime fiscal podería atentar contra os principios constitucionais e afectar a competencias tributarias autonómicas e ao dereito civil de Galicia, nos puntos xa mencionados. Na liña do pronunciamento da Comisión Superior de Dereito Civil en xuño, considera que o texto lexislativo estatal vulnera os principios de igualdade e neutralidade, xa que penaliza a tributación das herdanzas en vida en comparación coas herdanzas por falecemento.
Alega que este incremento do gravame do IRPF "dificulta enormemente" a realización dos pactos sucesorios, polo que afecta "de forma moi directa" a unha figura propia do Dereito Civil galego e a un costume "moi arraigado no pobo galego". Pero ademais, a Xunta considera que a normativa estatal afecta as súas competencias, en tanto que a tributación das herdanzas en vida afecta de forma moi directa ao dereito civil de Galicia, e que foron esas competencias as que permitiron regular os chamados pactos sucesorios que permiten a transmisión do ben en vida do causante como unha herdanza anticipada da herdanza e sen custo fiscal.
"EVIDENTE UTILIDADE SOCIAL"
Entre os argumentos do Executivo autonómico está tamén que estes pactos supoñen un anticipo da herdanza "cunha evidente utilidade social", xa que o herdeiro pode dispor deses bens como apoio patrimonial. De feito, no período 2016-2020 presentáronse, segundo datos da Xunta, un total de 145.489 solicitudes á autoliquidación do Imposto de Sucesións e Doazóns.
A norma estatal presume de forma automática que quen vende un ben transmitido por este pacto sucesorio antes do cinco anos, cometería unha fraude fiscal e grávao tributariamente, cousa que non sucede de herdarse este ben por falecemento. Tal "ficción legal", segundo o termo empregado polo Executivo autonómico, "descoñece o sentido e finalidade dos pactos sucesorios".
A súa natureza é, defende, de anticipo de herdanza, e a súa utilidade responde á necesidade do herdeiro de recibir os bens que lle corresponden na herdanza con anticipación ao falecemento do causante, na maioría dos casos pola necesidade de contar con ese apoio patrimonial para emprender unha actividade ou adquirir un ben (por exemplo unha vivenda).
