Bonnie Tyler actuará o 7 de decembro en Santiago

A cantante británica Bonnie Tyler actuará o vindeiro martes 7 de setembro, ás 22,15 horas, no Multiusos Fontes do Sar de Santiago de Compostela para presentar o seu último disco, 'The best is yet to come'. As entradas sairán á venda ás 17,00 horas deste martes a través de woutick.es.

Este concerto enmárcase na expansión do festival Vilablues, que nas súas seis edicións realizadas recalou en Vilagarcía de Arousa e Noia, para agora chegar con Bonnie Tyler á capital galega na súa edición 'Vilablues de Barrio'.

A galesa cantará o martes 7 de decembro, en vésperas do festivo do día 8, no Multiusos grazas á colaboración do Xacobeo 2021-2022 e da Xunta, xa que seleccionou este proxecto para a liña de axudas posta en marcha para paliar os efectos da pandemia da covid-19 no sector musical.

Bonnie Tyler presentará en Santiago o seu disco 'The best is yet to come' --'O mellor está aínda por vir'--. A cantante, segundo informa a organización, móstrase "moi feliz e orgullosa" do seu novo álbum.

"É simplemente rock, pero debuxa un sorriso na miña cara cada vez que o poño. Espero que estas novas cancións lles levante o ánimo. O momento no que poida ver as súas caras riseiras será moi especial. Prometo que o mellor está por vir", explica.

As entradas, que sairán á venda este martes ás 17,00, terán prezos variados. As primeiras 100 venderanse a 15 euros --máis gastos de xestión-- e o seguinte centenar sairán a 20 --máis gastos--. Estes prezos non variarán en función de que se escolla pista ou bancada.

No seguinte treito, ata cubrir as primeiras 1.000 entradas, o prezo será de 22 euros en bancada e de 27 en pista. A partir dese momento, ata pechar a venda anticipada, sairán a 25 en bancada e 30 en pista. No pavillón o propio día do concerto, subirán a 30 en bancada e a 35 en pistas.