Amancio Ortega entra no negocio das renovables, pero con parques fóra de Galicia

Repsol alcanzou un acordo con Pontegadea, o vehículo investidor de Amancio Ortega, para asociarse no parque eólico Delta, que conta cunha capacidade de 335 megawatts (MW) e está operativo desde marzo, mediante o investimento de 245 millóns de euros para tomar unha participación do 49% no proxecto, informou a enerxética.

Trátase da primeira operación do brazo investidor do fundador de Inditex e o home máis rico de España no sector das renovables e supón valorar o 100% do proxecto Delta, localizado na provincia de Zaragoza, en 500 millóns de euros. A compañía presidida por Antonio Brufau destacou que esta operación demostra "a solidez do modelo de crecemento de Repsol en renovables, baseado no desenvolvemento de proxectos desde as etapas iniciais ata a súa posta en marcha".

Coa incorporación de Pontegadea, a multienergética completa o seu modelo de negocio en renovables e asegura o seu obxectivo de obter unha rendibilidade de dobre díxito nos seus investimentos neste sector. O conselleiro delegado de Repsol, Josu Jon Imaz, valorou que contar con Pontegadea como socio en Delta "confirma a calidade dos nosos activos e vai permitir acelerar o noso crecemento en renovables, no marco dunha transición enerxética eficiente e sustentable, e no obxectivo de ser unha compañía cero emisións netas no ano 2050".

Pola súa banda, o conselleiro delegado de Pontegadea, Roberto Cibeira, asegurou que esta operación, "xunto a un socio sólido e fiable como Repsol, enmárcase na estratexia global de investimento de Pontegadea e permite afianzar o compromiso ambiental que acompaña a todas as actividades na nosa carteira, tanto no sector enerxético como na xestión de activos inmobiliarios ou a distribución téxtil". Banco Santander actuou como asesor de M&A exclusivo da operación.

Amancio Ortega, nunha imaxe de arquivo, na súa Coruña natal, onde reside. EUROPA PRESS - Arquivo