A débeda pública galega podería non volver a niveis prepandemia ata 2023
Así o vén de apuntar a Autoridade Independente de Responsabilidade Fiscal.
Por E.P. | SANTIAGO DE COMPOSTELA | 25/11/2021 | Actualizada ás 14:48
A Autoridade Independente de Responsabilidade Fiscal (Airef) prevé que Galicia non reduza o cociente de débeda/PIB a niveis previos á pandemia ata 2023. Nun informe publicado este xoves pola Airef, proxéctase unha redución da débeda pública a curto prazo no conxunto do país, pero alerta de riscos na sustentabilidade a futuro.
No caso de Galicia, prevé redución do cociente de débeda de 8,9 puntos de PIB nos próximos 15 anos. Baixo o mesmo escenario, proxéctase unha redución para o conxunto do subsector de 12,5 puntos. Segundo explica, o crecemento económico será o factor que máis contribúa na diminución. Esa redución "verase impulsada por unhas favorables condicións de financiamento e un saldo fiscal que se volvería positivo a mediados da década, alcanzando así o límite de referencia do 13% no ano 2030".
